Nick Nielsenip ilinniartitsisut tusaaniarpai
Isummat isumasioqatigiinnermi anninneqartut ilinniartitaanermut pilersaarummut toqqammaviliisussaasut, Ilinniartitaanermut naalakkersuisup Nick Nielsenip oqaatigaa:
- Upernaamut ilinniartitaanermut pilersaarut suliarisussaavarput, taava iliuusissatut pilersaarummi isummersuutaasimasut tunaartaajumaarput, toqqammaviujumaarput pilersaarutip suliarinissaanut, Ilinniartitaanermut naalakkersuisoq Nick Nielsen oqarpoq.
Nunatsinni ilinniartitaaneq pillugu isumasioqatigiinnermi oqaluuserisat assigiinngitsorpassuupput, assersuutigalugu meeqqat atuarfianni klassit immikkut atuartinneqartartut oqaluuserineqarlutik.
Immikkut atuartitsisarnerup siunissaq ungasinnerusoq eqqarsaatigalgu qimakkiartuaarneqarnissaa, Ilinniartitaanermut Naalakkersuisup Nick Nielsenip qanittukkut oqaatigaa, ilinniartitsisulli tamanna illuatungilerpaat, atuartut immikkut ittumik atuartinneqartartut klassinut nalinginnaasunut peqataatinneqarsinnaanerat ajornakusoorsorigamikku.
Nick Nielsenili tassunga atatillugu ima oqarpoq:
- Immikkut atuartitsineq ingerlanneqaraluarluni annerusumik akuunerulersitsineq ornikkiartuaarneqarsinnaavoq, taannalu isumasioqatigiinnerni aamma assersuutigiinnarlugu soqutigisaqartuninngaanniit soqutiginartutut oqariartuutigineqarpoq, Nick Nielsen oqarpoq.
EU-mik suleqatigiinnissamik isumaqatigiissut nutaaq 2014-imit 2020-p tungaanut atuuttussaq eqqarsaatigalugu Ilinniartitaanermut Pilersaarut II-mik taallugu Naalakkersuisut pilersaarusiuleruttorput, ilinniartitaanermi iliuusissatut periusissat toqqammavilersorneqaleruttorlutik.
Nunatsinni ilinniartitaanerup qaffassarneqarnissaa pillugu taama pilersaarusiortoqarpoq, pilersaarut siulleq, Ilinniartitaanermut pilersaarut I 2007-imit ukioq manna 2013-imut atuutsinneqarluni, maannalu tassa nutaanngorsarneqartussanngorluni.
Tassungalu atatillugu Nunatsinni ilinniartitaaneq pillugu isumasioqatigiinnerit ukioq manna arfinillit ingerlanneqareerput, ilinniartitaanermilu iliuusissatut pilersaarutit Inatsisartunut aappaagu upernaakkut saqqummiunneqartussaallutik, assersuutigalugulu meeqqat atuarfianni ilinniartitsisut qanimut suleqatigalugit pilersaarusiortoqaleruttortoq, Ilinniartitaanermut Naalakkersuisup oqaatigaa:
- Meeqqat atuarfiat eqqartorlutigu kommunit ilinniartitsisullu aamma oqariartuuteqarput, aamma uani kissaatigineqartut soorunami Naalakkersuisunit tusaaneqarput, Ilinniartitaanermut Naalakkersuisoq Nick Nielsen oqarpoq.
