New Zealandimiut coronavirusimik nunarsuarmi siaruatsaaliilluarnerpaasut

Brasiliap coronavirusi siaruatsaaliorniarlugu iliuuserisai nunarsuarmi nunat akornanni ajornerpaapput, New Zealandilu akerlianik inissisimalluni.

Isummersuisit Australiameersut nalunaarusiaanni taama inerniliisoqarpoq.

Isummersuisit Sydney Lowy Insititute nalilersuinerminni immikkoortut arfinillit aallaavigaat, soorlu inuit qassit coronavirusimut misissortissimanersut, tunillanneqarsimasut toqquteqarsimasullu amerlassusaat.

New Zealandip virusi siaruatsaaliniarlugu angalanermi killilersuinerit sukannersut atuutilersippai, nunallu matuneqarnissaa siusissumik aamma aalajangerlugu.

New Zealandimi, 5 millioningajannik innuttaqartumi, inuit 2000-t missaat tunillanneqarsimasutut nalunaarsorneqarsimapput 25-llu nappaat toqqutigisimallugu.

AAMMA ATUARUK New Zealandimut takornariat piumasaqaatinik malinninngitsut nunamit anisitaasalissasut

Nunarput nalunaarsuinermi peqataatinneqarpasinngilaq. Assersuusiussagutta nunatsinni tunillanneqarsimasutut uppernarsarneqartut katillutik maannamut 30-upput.

Nunat allat coronavirusip siaruatsaaliorniarnerani iluatsissimasut tassapput Vietnam, Taiwan, Thailand, Cypern Rwandalu.

Danmark nalunaarsuinermi normu 23-tut inissisimavoq.

Brasilia ajornerpaatut inissisimavoq, Mexico, Colombia, Iran USA-lu tulliullutik.

Coronavirusi tuniluutilermalli nunarsuaq tamakkerlugu inuit 100 millionit sinnerlugit tunillanneqarsimasutut nalunaarsorneqarsimapput, 2,3 millionillu missaat coronavirus toqqutigisimallugu.