New Zealandimut takornariat piumasaqaatinik malinninngitsut nunamit anisitaasalissasut

New Zealandimut isertut tamarmik nunami tassani ulluni 14-ini aneqqusaannginnerminnut piumasaqaatinik malinninngitsut nunamit anisitaasalissapput.

New Zealandip ministeriunera, Jacinda Ardern ataasinngornermi ullaassakkut taama oqarpoq. Nutaarsiassaqartitsivik Reuters taama allappoq.

Tassa inuit coronavirusip New Zealandimi siaruatsaaliornerani killilersuinernik malinninngitsut akuersaarneqanngilluinnassasut, Jacinda Ardern oqarpoq.

New Zealandimi naalakkersuisut inunnik takornariarnermut akuersissutilinnik nunasinermut inatsit nunaminni atuuttoq tunngavigalugu nunamit anisitsisalernissaat, tamannalu New Zealandimit anisitaasut pineqaatissinneqarsimanermik allagartaqalernerannik kinguneqarsinnaasoq aarlerisaarutaavoq. Nutaarsiassaqartitsivik New Zealand Herald taama allappoq.

MInisteriuneq: Amerlanerpaartaat kajumissutsiminnik angerlarsimaannarput

New Zealandimut isertut aneqqusaannginnermut piumasaqaatinik malinninngikkumanngitsut tikilluaqqusaanngitsut, Jacinda Ardern oqarpoq.

New Zealandermiut nunami allameereerlutik nunaminnut uterernerminnit ulluni 14-ini tulliuttuni angerlarsimaannarsimanngitsut peqqissutsimut oqartussaasut illuutaannut inissinneqassapput, taakkualu qimaaqqunagit politiinit nakkutigineqassallutik, Jacinda Ardern nassuiaavoq.

Angerlarsimaannaqqusaasullu amerlanerpaartaat kajumissutsiminnik angerlarsimaannarumaartut qularinngikkini, ministeriunerup aamma erseqqissaatigaa.

Nunamit allamit New Zealandimut isertunut ulluni 14-ini aneqqusaannginnermut piumasaqaatit Australiami aamma atuutilersinneqarput.