Napatitsinermut pilersaarut tigulluarneqartoq

Nunatsinni aningaasaqarniarnikkut unammilligassat nappassinissamut siuariartortitsinissamullu pilersaarutip aqqutissiuuttussaavai. Pilersaarullu Aningaasaqarneq pillugu Siunnersuisoqatigiinnit aamma tigulluarneqarpoq, siunnerfigisallu kiisami saqqummiunneqarnerat taakku nuannaarutigaat.
Torben M. Andersen
Torben M. Andersen Assi © : Jonas Fievé/KNR

- Pilersaarusiortoqarnera ajunngilluinnartuusoq isumaqarpunga, ajornartorsiutimmi politikkikkut suliniuteqarfigineqarluartut tassuuna takussuserneqarpoq, Aningaasaqarneq pillugu Siunnersuisoqatigiinnit siulittaasoq, Torben M. Andersen oqarpoq. 

Unammillernartormi tassaavoq utoqqaliartoratta. Tassalu pisortat minnerunngitsumik  peqqinnissaqarfimmik aningaasartuuteqarnerulissapput. 

Aamma atuaruk Nunatta karsia 1 milliard koruuninik amigartoorfiussaaq

Isertitat malinnaasinnaanngimmata nunattalu karsia aningaasarsiornikkut navialissanngippat, Naalakkersuisut aningaasartuutit aquttariaqarpaat, isertitammi aningaasartuutillu assigiinngissutaat annertusigaluttuinnassapput, qunnersuarmut qanilliartuinnalerluta.

Pilersaarutip suliniutit tigussaasut aamma taakkartorpai, assersuutigalugu suliat qarasaasiarsornerulluni naaammassineqartartut amerliartornissaasa sammineqarnerulerat.

Aamma atuaruk Naalakkersuisut Ilanngaassivik pilersippaat

- Taakkartuiinnarnerli naammanngilaq, naammassineqartariaqarput. 

Siunnersuut siullermik aaqqiissuteqarnissamut aallarnisaassasoq, aningaasaqarnermik ilisimasallip ilimagaa.

- Taamaaliornikkut politikkikkut akisussaaffimmik tigusipput, taavalu oqasertalersuillutik ajornartorsiutit suut siunitsinninnerinik qanorlu tamakkua iluarseriarsinaanerinik politikerit innuttasullu oqallissinnaaniassammata.
Taamaammat alloriaqqinnissamut najoqqutassamik nappassinissamut siuariartornissamullu pilersaarummik allassimaneq, Torben M. Andersenip nuannaarutigaa, alloriaqqinnissamik suunissaanik tungaviliimmat. 

Aamma atuaruk Naalakkersuisut nappassinissamut pilersaarutsik saqqummiuppaat

- Iluarsaaqqinnerimmi ilaat naammassineqareerput, aningaasaqarnikkulli ilorraap tungaanut aallarsinnaanngornissatsinnut aqqut suli takivoq, utoqqaat amerlanerulertussat, inuussutissarsiutit ineriartornissaannut  toqqammavissaat pitsaanerusut, pissarissaarnerulernissarlu inissaqartittussagatsigit.