Naalakkersuisut Ilanngaassivik pilersippaat

Nunatsinni innuttaasut tamatta immikkut pisortanut agguaqatigiisillugu 16.000 koruuninik akiitsoqarpugut. 

Taamaattumik akiitsunik akiliisitsisarnermik aaqqissuussamik "Ilanngaassivik"-mmik taasaminnik Naalakkersuisut pilersitsisut, aningaasaqarnermut naalakkersuisup Randi Vestergaard Evaldsenip, napatitsinermut siuariartortitsinissamullu pilersaarut ippassaq saqqummiummagu tamanna oqaatigaa.

- Tamanna ajoraluartumik pisariaqarpoq. Pisortanut akiliinngitsoortartut amerlapput, tamannalu allanngortittariaqarparput, aningaasaqarnermut naalakkersuisoq, Randi Vestergaard Evaldsen, oqarpoq.

Aamma atuaruk Naalakkersuisut nappassinissamut pilersaarutsik saqqummiuppaat

Tamannalu unammillerfiussaaq, innuttaasummi ileqqutik allanngortariaqarpaat pisortanut akiligassatik nammineerlutik akileriartortalerlugit.

- Tamanna Pisariaqarpoq, inuimmi ataasiakkaat akiligassaat inuiaqatigiit akilertussaanngilaat, Randi Vestergaard Evaldsen, oqarpoq.

Ilanngaassivik tassaavoq pisortat aaqqissuussaat innuttaasut akiitsullit akiitsuinik akiliisitsiniarnermik pisariillisaataasussaq. 

Tassalu assersuutigalugu innutaasut aningaasarsiaminnik tigusitinnagit ineqarnerut innaallagissamullu akiligassaat ilanngaatigineqareertalissapput. 

Naallu innutaasut pisortanut akiitsui ikiliartoraluartut, suli akiligassaqaqisoq Randi Vestergaard Evaldsen oqarpoq. 

- Pisortanut akiligassat suli amerlavallaarujussuarmata iliuuseqarfiginiarparput, taamaasiornikkut 1 milllard koruunit, attassisinaanermut siuariartornissamullu pilersaarummi amigaatigisagut pissarsiariniassagatsigit. 

Inuillu akissarsiassaannit ilanngarneqartassasut, aningaasaqarnermut naalakkersuisup oqaatigaa.

- Naapertuilluanngikkaluarpoq pisariaqarporli. Ileqqorisanik allannguisitsissaaq imminnullu pilersorsinnaalernissaq pisariaqarpoq. Pisortaniit taamatut malittarisassiorneq uggornarlunilu ajuusaarnaraluarpoq, ajoraluartumilli pisariaqarpoq.