Naalakkersuisut nappassinissamut pilersaarutsik saqqummiuppaat

Naalakkersuisut Napatitsinermut siuariartortitsinissamullu pilersaarutaat Aningaasaqarnermut naalakkersuisup, Randi Vestergaard Evaldsenip ualeq manna saqqummiuppaa.
Allattoq Jens Thorin
maajip 30-at 2016 15:22

Pilersaarummi assersuutigalugu utoqqartatta pilersornissaannut aningaasassaqartuaannarnissaq inuiaqatigiittullu pisuujunerulernissarput  qulakkeerniarneqarpoq.

Inuiaqatigiit toqqissisimanarnerulerlutillu siunissarissaarnerulissappata assigiinngitsutigut suli ineriartoqqinnerusariqarpugut.

-  Nassuerutigisariaqarparpullu sunniutit kissaatigineqartut takkutissappata inuiaqatigiit aaqqissugaaneranni assigiinngitsorpassuartigut iluarsiisinnaagatta, siunissami kinguaariit pigissarnissaat atugarissaarnissaallu qulakkeerniarlugit taamaalillutik tamatsinnut toqqammaviulerlutik, Randi Vestergaard Evaldsen pilersaarutimini allappoq.

Naalakkersuisut Napatitsinermut siuariartortitsinissamullu pilersaarutaat ataatsimut isigigaanni iluarsaaqinnissanik sisamanik imaqarpoq.

Inuiaqataasut ilinniagaqarsimasusiat qaffassarneqassaaq. Siuariartorneq siuarsarneqassaaq arlalinnillu sammivilimmik aningaasaqarnermut allanngortitsinneqassalluni. Pisortat ingerlataqarfiinik nutarterneqassaaq. Taavalu Atugarissaarnermi pisartagarisat siunissamut qulakkeerneqarneqassalutik.

Inuiaqatigiit pitsaanerusut ingerlalluartullu qanoq pilersinnissaannut napatitsinermut siuariartortitsinissamullu pilersaarut toqqammavinnik inissiissaaq. Kisiannili uagut innuttaasut, suliffeqarfiit namminersortut aamma pisortat suliffeqarfii toqqammavinnik immersuissaagut, Randi Vestergard Evaldsen oqarpoq nangillunilu:

- Taamaattumik inuiaqatigiinni pingaarnertigut suliassat annertuut ilungersunartullu aaqqiiffiginissaannut kikkut tamarmik ikiuunnissaat kaammattuutigissavara, taamaalilluni nunarput inuuffigissallugu toqqissimanartuulerluni  pilerinartuulerluni aamma piujuartitsinermik tunngaveqartumik suliffeqarfinni aningaasaliinissamut ingerlatsinissamullu pisortat tungaanniit pitsaasunik toqqammavissiisoqarluni.