Nannut piaraat Issittumi mingutsitsinermit eqqugaanerpaasartut
Ilisimatuut Issittup ilarujussuani, Svalbardimiit Kalaallit Nunaannut Alaskamullu misissuisimapput, akuutissat arrortikkuminaatsut assigiinngitsut 19-it annertussusaannut paasissutissat katersorsimallugit.
Akuutissat taakku naatsunngorlugit POP-imik (Persistent Organic Pollutants) taaguuteqarput, assersuutigalugu saarullinni, natserni nannunilu nassaassaallutik. Nannut POP-init eqqugaanerpaasartut misissuinerit takutippaat, akuutissammi tamakku uumasuni nerisariinni annertusiartortarput, nannullu kiisortuummata nerisat akuutissallit amerlasuut nerisarivaat.
Nannut inerissimasut akornanni akuutissat ulorianassusaasa qummut killinga qaangerlugu 100-riaammik akuutissaqartut misissuinerit takutippaat, nannullu piaraat akuutissat ulorianassusaasa qummut killinga 1000-eriaammik annertutigisumik akuutissaqartarlutik.
Akuutissat arnavissamit piaqqamut immuk aqqutigalugu ingerlateqqinneqartarput. Misissuinerilli aamma takutippaat akuutissat POP-t nannut piaraanni nassaassaasut 1980-ikkunnili ataatsimut isigalugu annikilliartorsimasut.
Aalajangersagaq Stockholm-konventionimik taaguutilik matumani peqqutaanerpaavoq. Aalajangersagaq taanna 2001-imi atsioqatigiissutigineqarpoq, akuutissallu ulorianarnerpaat atorneqaqqusaajunnaarsitaallutik.
Akuutissat nunani tamalaani atorneqaqqusaajunnaarsitaanerat iluaqutaasoq inernerit takutippaat, akuutissallu nakkutigineqaannarnissaat taamaamma innersuussutigineqarluni.