Namminersorlutik Oqartussat rubinit nunatsinneersut Asiamit tikiussat isumannaatsumut toqqoraat

Greenland Ruby 2024-mi akiliisinnaajunnaarmat rubinit Qeqertarsuatsiaat eqqaanni Aappaluttumeersut Indiami Thailandimilu quersuarni toqqorsivinniipput.

Tassani ujaqqat aappalaartut suliarineqariartorput.

Maanna nunaminnut, tassa nunatsinnut, assartorneqarsimalerput.

Taama Jørgen Hammeken-Holm, inuussutissarsiornermut, aatsitassanut, nukissiutinut, inatsisit atuutsinneqarnerannut naligiissitaanermullu naalakkersuisoqarfimmi pisortaq ilisimatitsivoq.

Oqaluttuaq filmerpalaarnerarpaa: 'Indiana Jones aamma rubinit Kalaallit Nunaanneersut Asiamit tikiussat'.

Tamanna pissutigalugu aamma rubinit nunatta sortaaniinnersut oqaatigiumanngilaa, rubinimmi inunnit iluarpallaanngitsunit pilerigineqartarmata.

- Nunatsinni isumannaatsumiitinneqarput, naalakkersuisoqarfimmi pisortaq oqarpoq.

Sumiinnersut sooq oqaatigerusunnginnerlugu nassuiarsinnaaviuk?

-Ussernartorsiortartut tigoriaannaasoreqinammatigit . Taamaattoqanngilarli - pissarsiariuminaallutillu aningaasarsiutigiuminaapput. Tamanna ajornartorujussuuvoq.

Nunatta suli pigilinngikkai

Naak ujaqqat qaqqameeqqileraluartut, kikkunnit pigineqarnersut suli akerleriissutaavoq.

Filmimi pissanganartumi rubininik ujaasinermut tunngasumi pisut assiginagit, uani namminersorlutik oqartussat eqqartuussissuserisui atorfilittaasalu taakkulu illuatungiisa eqqartuussissuserisuisa akornanni akerleriinneq pivoq.

Tusagassiorfik Finans Greenland Rubymik piginnittut tamarmik 1,9 milliardit koruuninik akiitsoqalersimasut siorna allappoq.

Jørgen Hammeken-Holm inuussutissarsiornermut, aatsitassanut, nukissiutinut, inatsisit atuutsinneqarnerannut naligiissitaanermullu naalakkersuisoqarfimmi pisortaavoq. Namminersorlutik Oqartussat politikkerillu rubinit qanoq pineqassanersut oqaloqatigiissutigisimanngikkaat oqaluttuarpoq. Kia piginnittuunerata inisseqqaarnissaanik tamanna pissuteqarpoq. Assi © : Naalakkersuisut

Jørgen Hammeken-Holm rubinit naleqartutuanngormata ujaqqat taakkua pigilivinnissaat illuatungiusunit soqutigineqarluartoq oqaluttuarpoq.

Namminersorlutik Oqartussat aatsitassarsiorfik akiliisinnaajunnaarpat nunatsinnilu akuersissutaaruppat, taava aatsitassat tamarmik nunatta pigigai isumaqarput.

- Kikkut tamarmik tamanna isumaqatiginngilaat, tamannalu paasinarpoq. Taannami ingerlatseqatigiiffimmi pigisatuaavoq, tassa ingerlatseqatigiiffimmi naleqarnerpaasoq, Jørgen Hammeken-Holm oqarpoq.

Taamaattumik Namminersorlutik Oqartussat kikkut rubininik piginninnerat pillugu eqqartuussivimmi suliap aallartinnissaa naatsorsuutigaat.

- Illuatungiusut rubinit aningaasannassutigerusuppaat. Uagulli aningaasanik tuninianngilagut, ujaqqammi nunatta pigereerai isumaqaratta. Taamaattumik eqqartuussivimmi suliassanngortinneqaratarsinnaavoq.

Nunarsuup imartaani assartuineq

Tamanna pissutigalugu Namminersorlutik Oqartussanut nakkutilliisoqarfimmullu ujaqqat isumannaatsumik toqqorneqarnissaat pingaaruteqarpoq.

- Thailandimi quersuaq ernumagingaaleratsigu isumakululerpugut. Isumannaatsutut isiginngilarput. Rubinit tammaraluarpata pissarsiareqqinngisaannassagatsigit, Jørgen Hammeken-Holm oqarpoq nangillunilu:

- Piffissap ilaani aalajangerpugut oqarlutalu: ’Aatsitassat taakkua maannakkut  isumannaassavagut', taamaalillutik Thailandimikkunnaarlutillu Indiamiikkunnaarput. Nakkutilliisut taamaaliornissamut isumaqataatilerpagut.

Aappaluttumi aatsitassarsiorfik matunikuuvoq. Piginnittut ingerlatsivik matunnginniassammat tuniniarniarsaralugu aaqqissuuteqqinniarsaraluguluunniit <a href="https://knr.gl/kl/nutaarsiassat/greenland-ruby-akilersuiunnaartoq">KNR-imut aggustimi 2024-mi oqarput</a>. Tamannali iluatsinngilaq. &nbsp; Assi © : KNR/Anton Gundersen Lihn

Aatsitassanut Naalakkersuisoqarfiup sulisuni pissutsinik paasiniaajartortillugit Indiamut Thailandimullu aallartippai.

Namminersorlutik Oqartussat rubinit tamatuma kingorna namminneq poortorpaat nassiussinermilu karsit ammarneqannginnissaat qulakkeerniarlugu naqissuserlugit.

- Iluamik torersumillu pinissarput uagutsinnut pingaaruteqarpoq. Sulisugut assartuisitaapput; imaanngitsoq mafiami ilaasortaasut allalluunniit peqquserluttut, naalakkersuisoqarfimmi pisortaq oqarpoq.

Ujaqqat nunatsinnut siorna aasaanerani ukiaaneranilu arlaleriarlugit tikiunneqarput.

Taama naleqartiginngitsut

Jørgen Hammeken-Holm rubinit amerlasuut assartorneqartut  oqaluttuarpoq.

Tamanna isumannaallisaanermik sukateriffiusumik kinguneqarpoq, ilaatigut sillimmasiinikkut aamma karsit quersuarmiit nassiussiffissaannut paarsisunik sakkulisartunik illersorneqarnerisigut.

Naalakkersuisoqarfimmili pisortap pissutsit takorlooruminarnerusumit pissanganarnerunngitsut erseqqissarpaa.

Naak ujaqqat 'amerlarsoorujussuit' pineqaraluartut, ujaqqat naleqarujussuunnginnerat, naalakkersuisoqarfimmi pisortap Jørgen Hammekenip oqaatigaa. Ujaqqat amerlanersaasa pitsaavallaannginnerat, tamatumunnga pissutaavoq. Tamatuma saniatigut suliarineqarnikuunatillu atortussianik atorneqarsinnaanngitsunik avatangerneqaqqapput. Assi © : KNR/Anton Gundersen Lihn

Naalakkersuisoqarfimmili pisortap piviusoq, naak allaaserisap qulequtaanit pissanganarpaluttorujussuusinnaagaluartoq, taamaassorinngilaa.  

Ujaqqat taakkua nalituujunngillat.

Rubinit Aappilattumi rubinisiorfimmeersut pitsaassusaasa qaffasippallaannginnerat tassunga pissutaavoq.

Namminersorlutik Oqartussat ujaqqat tamaasa, amerlanersaat suliarineqarsimanngitsut pitsaanngitsullu, tigoreerpaat.

- Nakkutilliisut ujaqqat tuniniareeraluarpaat. Pisiumasoqarsimagaluarpoq. Pisiumasut 1 millionit koruuninik neqeroorput, uagulli akunnagaarput. Kisianni tassa aki taanna nakkutilliisut taamani pissarsiarisinnaasimavaat.  

Saqqummiineq tuniniaanerluunniit 

Siunissami eqqartuussivilersuutaaratarsinnaavoq.

Kalaallit Nunaat rubininik piginnittuutitaassappat politikerit ujaqqat qanoq iliuuseqarfigissanerlugit aalajangertariaqarpaat.

Piffissaq taama sivisutigisoq qaangiutereermat ujaqqat tigunissai erininarsimanissaa takorloorsinnaavara?

- Rubinit millionilikkaanik naleqarnersut ilisimagaluarukku, uangalu attortuugukkit, immaqa taamaassagaluarpoq. Aatsitassarli naleqanngilluinnarpat taamaannavianngilaq. Kalaallit Nunaata rubinit nalingannik pissarsinissaa qulakkeertariaqarparput, Jørgen Hammeken-Holm oqarpoq.

Ujaqqat ujaqqallu nalingisa siunissami qanoq inissisimanissaat oqallisigivisiuk?

- Tamanna eqqartornikuunngilarput.

Politikkikkut sivisunerusumik kinguneqarnissaa naatsorsuutigaajuk imaluunniit allaffissornermut tunnganerua?

- Ujaqqanut piginnittuutitaaffimmut tunngasoq paasineqareerpat, ujaqqat qanoq pineqarnissaat eqqarsaatigisinnaavarput.

- Arlaatigut tuniniaanissamut periarfissaqarpoq, soorlu akitsorterussinikkut allatigulluunniit. Kisianni kingorna qanoq pineqarnissaat suli nalilersuiffigineqanngilaq.

Ujaqqat tamanit takuneqarsinnaanngussanersut oqallisigineqarpa?

- Taamaattoqartikkusunnaqaaq. Takutsitsiverujussuarmik igalaajusumik matoqqasumik rubininik ulikkaaqqasumik takutitsiviliorsinnaasuugaanni torraassagaluaqaaq; rubinit naleqarpallaanngikkaluarpataluunniit. 

Apeqqutit akissutissarsineqanngitsut qaqugu akissutissarsineqarnissaat neriuutigaasiuk?

- Piginnittuutitaanermut tunngasut aasaru sulinngiffeqartoqalinnginnerani akissutissarserusuppagut, naalakkersuisoqarfimmi pisortaq naggasiivoq.