Greenland Ruby akiliisinnaajunnaartoq

Greenland Ruby A/S akiliisinnaajunnaartutut ullut marluk matuma siornatigut nalunaarutigineqarpoq. Ingerlatseqatigiiffimmi aqutsisut akiliisarnerminnik unitsitsillutik suliffeqarfik sivisuumik annaanniarsarigaluarpaat, iluatsinnaguli.

Aatsitassanut Naalakkersuisoqarfik tusagassiuutinut taama nalunaaruteqarpoq.

Naalakkersuisut suliap ineriartornera pillugu ingerlaavartumik ilisimatinneqartarsimapput, tassungalu atatillugu maleruagassat atugassarititaasullu naammassiniarneqarnissaat naalakkersuisunit pingaartinneqartoq nalunaarutigineqarluni.

- Akiliisinnaajunnaarluni nalunaaruteqarneq taanna tupaallannartutut saqqumminngilaq. Piffissami sivisunerusumi Greenland Ruby A/S-imut tunngatillugu ingerlatat annikilliartuaartinneqarsimapput, kisianni neriuutigineqarsimagaluarpoq Qeqertarsuatsiaat eqqaanni rubininik piiaanermut attanneqarsinnaasumik siunissamillu qulakkeerisumik allatut Greenland Ruby A/S aaqqiissutissarsisinnaassasoq, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja Nathanielsen tusagassiuutinut nalunaarummi oqarpoq.

Akiliisinnaajunnaarnermi aaqqiissutissap sulissutigineqarnerani immikkoortup aappaa maanna aallartippoq, tassanilu akiliisinnaajunnaarnermi pigisanut isumaginnittussat eqqartuussissuserisullu toqqarneqarlutik, Namminersorlutik Oqartussallu pisumi tassani pitsaanerpaanik aaqqiissutissarsiniarnissaq pillugu qanimut oqaloqateqarneq ingerlatiinnassallugu.

Rubininik tunisassiornissamut soqutiginninneq

Ingerlatseqatigiiffimmi nalillit sinneruttut qulakkeerneqarnissaat, ilanngullugulu ingerlatseqatigiiffiup nunatsinni nunanilu allani toqqorsiviisa isumannaarnissaat, Namminersorlutik Oqartussanut pingaaruteqartoq nalunaarutigineqarpoq.

Aatsitassanut oqartussat aaqqiissutissarsinissamut eqqartuussissuserisut pigisanut isumaginnittussat qanimut attaveqarfigigaat, Naaja Nathanielsenip ilanngullugu oqaatigaa, tassanilu nunatsinni nunanilu allani toqqorsivinnik assartuisinnaaneq iliuuseqarfiginnissinnaanerlu ilanngunneqarlutik.

Aatsitassanut oqartussat eqqartuussissuserisut pigisanut isumaginnittussat aammalu Greenland Ruby A/S-imi aqutsisut qanimut suliap ingerlanera tamaat oqaloqatigisarsimavaat.

Akiliisarnerit unitsinneqarnerisa nalaanni pisisussaasinnaasut arlallit nunatsinni rubininik tunisassiornerup tigunissaanut ingerlateqqinnissaanullu soqutiginnillutik takutissimavaat.

Eqqartuussissuserisut pigisanut isumaginnittussat qanimut suleqatigalugit, Kalaallit Nunaanni rubininik tunisassiornerup siunissami ingerlaqqissinnaaneranut periarfissat Aatsitassanut oqartussat maanna misissorpaat.

Soqutiginnittumik pisisussaqassappat, pisisussaq rubininik tunisassiornerup ingerlateqqinnissaanut pisariaqartunik aningaasaqarnikkut piginnaaneqarnersoq teknikkikkullu ilisimasaqarnersoq, oqartussat nalilersussavaat.

Naalakkersuisut ineriartorneq malinnaaffigeqqissaarpaat suliamilu nutaarsiassaqalerpat oqaaseqassallutik nalunaaruteqarput.