Greenland Rubyp pisortaa: Rubininik tuniniaanitsinni pikkorluppugut

Nunatsinni qaqqani ujaqqat pinnersaasiassat aningaasarsiutiginiaraanni piiaanerinnaq naammanngilaq.

Ujaqqammi pinnersaasiassat aamma tunineqassapput.

Piginneqatigiiffik aligornik aappaluttunik piiaasimasup akilersuiunnaarnera saqqummiunneqareersorlu, piginneqatigiiffiup Greenland Rubyp pisortaa, Arnt-Eirik Rørnes, taama naatsigisumik nassueruteqarpoq.

- Tuniniaaneq ukkatarinerusussaagaluarparput, immaqalu piiaaffik ukkatarivallaarsimavarput, taanna KNR-imut oqarpoq.

Piginneqatigiiffik Nuummiit kujammut 160 kilometerisut ungasitsigisumi piiaaffimmi aligornik aappaluttunik tungujortunillu 2016-imiilli piiaasinnaatitaavoq.

Piiaaffilli 2021/2022-milu ukiut nikinneranni matugallarneqarpoq. Tamanna Greenland Rubyp aligornik aappaluttunik piiaaleqqitsigani uninngasuutiminik tunisaqaqqaartariaqarneranik pissuteqarpoq.     

Taamaalilluni nunarput ujaqqanik pinnersaasiassanik nioqqutissiorunnaariasaarpoq.

Norskit ilaqutariit piginneqatigiiffiat, LNS Group, Greenland Ruby A/S-imik pingaarnertut piginnittuuvoq. Piginnittut aqutsisullu tuniniaanermik suliaqarnerusimasariaqaraluartut, pisortaq oqarpoq.  

- LNS-ip aatsitassarsiortutut ilisimaneqarnera immaqa aamma peqqutaasinnaavoq, uanimi suliniummi rubinisiorfimmi piiaaneq aammali tuniniaanermik annertusaaneq ujaqqallu pinnersaasiassat tuninissaat aamma suliassaapput. Tamannalu misilittagaqarfigineqarpallaanngilaq, Arnt-Eirik Rørnes KNR-imut oqarpoq.    

Greenland Ruby A/S-ip akilersuiunnaarnerata kingunerisaanik piginneqatigiiffiup matunissaani pigisanik agguaassinermut Nuummi eqqartuussivik naalakkersuisullu suleqatigineqarput. 

Pisisartoqareersumik aningaasaliisussarsiorneq

Piginneqatigiiffiulli tamakkiisumik imaluunniit ilaata pisiarineqarnissaa aamma Aappaluttumut assingusumik minnerusumik aallartittoqaqqinnissaa, Greenland Rubymi aqutsisut kissaatigaat.

Taassumalu saniatigut pisisussaq ujaqqanik pinnersaasianik nunani assigiinngitsuni tuniniaanermik piianermillu sapinngisamik misilittagaqariissasoq, Arnt-Eirik Rørnes oqarpoq.   

- Uani suliniummi piginnittussaq eqqortoq nassaarerusupparput, taamaalilluni piiaaffik minnerunngitsumillu tuniniaaneq iluatsilluarpata suliniummik nalituunngortitsissammat, kalaallinulli inuiaqatigiinnut iluaqutaanissaa pingaarnerpaassaaq.

Rubinilli pitsaassutsimigut qaffasinnerpaanngitsut ukkatarineqarnissaat pisariaqarpoq. Taakkumi Aappaluttumi piiaaffimmi takussaanerpaasut, pisortaq oqarpoq.

- Ujaqqat appasinnerusumik pitsaassusillit piiaaffimmi piiaarneqartartut takussaanerpaapput. Suliniullu ingerlaannassappat taakku tunineqarsinnaasariaqarput.

Ujaqqalli pinnersaasiassat Aappaluttumeersut annerusumik paasisaqarfigineqarsinnaapput. Tassa aligoq aappaluttoq sumi qangalu piiarneqarsimanersoq pisisussap paasisinnaassavaa.

Taamalu periarfissaqartitsisarneq aatsitassanik suliaqarfiusuni imaannaanngeqaaq, aatsitassammi sumi piiarneqarsimanerat aamma avatangiisinut mingutitsinnginnissamut inatsisit aamma piujuartitsineq kiisalu inuit pisinnaatitaaffiisa unioqqutinneqarsimannginnerat oqallisigineqartaqaaq.

Taamaattumillu nunatsinneersunik aligornik aappaluttunik piiaanissamut tuniniaanissamullu aningaasaliisoqarusussasoq, Arnt-Eirik Rørnesip ilimagaa.

- Ujaqqat pinnersaasiassat immikkuullarissuupput. Nunarsuarmilu rubinisiorfinni kisiartaalluta piiaaffimmiit tuniniarneqarneranut ammasumik ingerlatsinerput tulluusimaarutigeqaarput, taanna oqarpoq.