Greenland Ruby akilersuiunnaartoq
Piginneqatigiiffik aligornik aappaluttunik nunatsinni nunanilu allani tuniniaasuusoq, Greenland Ruby nalorninartorsiorpoq.
Greenland Ruby ujaqqanik pinnersaasiassanik Aappaluttumi Nuup kujataani kilometerit 160-it missaannik ungasitsigisumiittumi 2016-imili piiaasarsimavoq, piginneqatigiiffillu taanna maanna tassa akilersuiunnaarpoq.
Akiitsuminnut arlaleriarlutik akilersuutissaalatsisareerlutik taamaaliortariaqarlutik, Greenland Rubyp tusagassiorfinnut nalunaarummini ilisimatitsissutigaa.
Greenland Rubyp pisortaanera, Arnt Eirik Rørnes KNR-imut ima oqarpoq:
- Aligornimmi aappaluttunik tungujortunillu iluatsittumik piiaasareerpugut. Taakkuninngali niuffaffinni tunisakippugut. Tamakkuninngami niuffaffinnut pissusitoqarpassuarnik attassikkajuffiusuusunut akulerunniarneq imaannaanngilaq. Akulerunniarnerpullu tassa iluatsippallaanngilaq.
Erniat qaffakkiartornerat aningaasallu naleerukkiartornerat ujaqqanik pinnersaasiassanik niuffaffinni ukiuni kingullerni unammilleqatigiinniapiloortitsisut, Greenland Rubyp aamma ilisimatitsissutigaa.
Kalaallit Nunaanni rubinisiorfitsik matugallaritsik aligornilli uninngasuutiminnik tuniniaaginnassallutik, piginneqatigiiffiup 2022-mi nalunaarutigaa.
Rubinisorfimmi sulisut 30-t 2022/2023-mi ukiup nikinneranni soraarsinneqartut rubinisiorfimmilu aggustip 19-iani sulisuerutissasoq, Sermitsiaq siorna allappoq.
Aappaluttumi rubinisiorfigisimasartik tuniniaraat
Piginneqatigiiffitsilli akiilisinnaajunnaartutut nalunaarutigilersaanngikkitsik, Greenland Ruby ilisimatitsivoq.
Tassa Greenland Rubyp siulersuisui pingaarnertullu piginnittui Leonhard Nilsen & Sønner Eiendom AS piginneqatigiiffimmi ingerlatseqatigiiffiutertik LNS Mining A/S-itigoortumik allannguiniarput. Nakkutilliisut, pigisanik agguaassinermut Nuummi eqqartuussivik naalakkersuisullu suleqatigalugit allannguissapput.
Aappaluttumi rubinisiorfigisimasartik piiaaffiuleqqissinnaaqqullugu piginneqatigiiffiup tamakkiisumik ilaannakortumilluunniit tuninissaa siunertaralugu taamaaliorput.
- Siulersuisut Greenland Ruby Kalaallit Nunaannilu suliai suli ilippanartut upperigamikku piginneqatigiiffimmi allannguniarlutik aalajangerput, pisortaaneq Arnt Eirik Rørnes tusagassiorfinnut nalunaarumminni allappoq.
Aappaluttumi eqqaanilu suliffissanik pilersitserusussusilimmik pisisussarsiorlutik, pisortaaneq Arnt Eirik Rørnes oqarpoq.
- Inuiaqatigiinnut sunniuteqarluartussamik suliniuteqartoqarnissaa pingaaruteqarpoq, taanna KNR-imut oqarpoq.
Greenland Rubyp USA-mi Frankrigimilu immikkoortortatut ingerlatseqatigiiffii ilanngullugit tuniniassapput.
Greenland Ruby kiffartuussivimmik Thailandimi aamma suliffeqarfiuteqarpoq. Kiffartuussivitsilli taanna tuninialersaanngikkitsik, Greenland Ruby ilisimatitsivoq.
