Ujarassiooq: Rubinit Kalaallit Nunaanneersut oqaluttuassartaasa pilerinarsisissavaat

Nuummiit kujammut 160 kilometerisut ungasitsigisumiittoq rubinisiorfik Aappaluttoq matuvoq.

Imaluunniit aatsitassarsiutileqatigiiffiup Greenland Ruby A/S-p aningaasaleerusuttumik taamalu ujaqqanik pinnersaasiassanik aappaluttunik piiaarusuttumik tuniniaarusuttumillu nassaarnissaata tungaanut.

Aatsitassarsiutileqatigiiffiup sapaatip-akunnerata uuma siuliani akilersuiunnaarnerata kingorna taama pisoqarpoq.

Taamaalilluni nunatsinni ujaqqanik pinnersaasiassanik piiaasoqarunnaarpoq.

Pisorlu uggornartoq Kristoffer Szilas oqarpoq, taanna Københavns Universitetimi geologiimi lektoriuvoq ilaatigullu nunatsinni ujarassiornermik immikkut sammisaqarluni.  

- Aatsitassarsiutileqatigiiffimmut uggornarpoq, neriunaateqaraluaqaarmi. Aammali piiaasoqarunnaarnera Kalaallit Nunaannut uggornarpoq. Aningaasaleerusuttoqassasorli Kalaallit Nunaannilu suliniutinik allanik aallartittoqassasoq neriuutigaarput.   

Aappaluttumili rubinisiorneq aallarteqqilluarsinnaavoq.

Aligormi aappaluttoq nunatsinneersoq aamma ujaqqanik piiaariaaseq nunarsuarmi nunani allani ujaqqanik pinnersaasiassanik piiaasartunit amerlanerpaanit immikkuullarissuteqarpoq.

Appasinnerusunik pitsaassuseqartoq oqaluttuassartaqarnerusorli

Greenland Rubyp pisortaanera, Arnt-Eirik Rørnes, naatsukullammik ima oqarpoq: Rubinit Aappaluttumi piiaaffimmeersut pitsaassutsimikkut allanngorarput.

Aligoq aappaluttoq pitsaalluinnartoq piiarneqartartoq annertunngilaq, piiarneqartartulli annertunersaat pitsaassutsimikkut appasinnerupput, taakkulu tuniniarniarnerat ajornarnerusarpoq.

- Ujaqqat pinnersaasiassat pitsaalluartut Aappaluttumeersut tuneriaannaapput. Pitsaassutsimikkulli appasinnerit tuniniaraanni pilerisaarisoqangaatsiartoqartariaqarpoq.

Tamanna Kristoffer Szilasip uppernarsarpaa. Aligormi aappaluttoq nunatsinneersoq soorlu Asiap kangimut kujasissuaneersuneersutulli pitsaatiginngilaq. Taakkumi ujaqqat pinnersaasiassat pinngoriartortarnerat pissutaavoq.    

- Asiap kangimut kujasissuani allatut pinngoriartortarput. Taakku rubinit nutaanerupput qaqqallu ujaraanni allaanerusuni pinngortarput, pinngorfiilu minguinnerummata pitsaanerusarput, taanna oqarpoq.  

Aligorli aappaluttoq tungujortorlu nunatsinneersut nunani kiattuneersunut sanilliullugit ukiuni amerlanerungaartuni pinngoriartuaartarput.

Rubinimmi Aappaluttumeersut ukiut 2,7 milliardtit missaannik pisoqaassuseqarput – tassa nunarsuarmi suli uummassuseqalinnginnerani.

- Kalaallit Nunaanni oqaluttuassartaq kingumut ukiut 3 milliardtingajaat tungaanoorpoq. Taakku rubinit pinngoriartorneranni nuna allanngorartuarpoq, taamaammallu pitsaassusaat appasinnerummat tuniuminaannerugunarlutik. Oqaluttuassartaali immikkuullarissoq tuniniaanermi pilerisaarutigineqassaaq, Kristoffer Szilas oqarpoq.     

Piujuartitsineq eqqarsaatigalugu pinnersaateqarneq mutiusoq

Aningaasaliiniartullu suliassaa tassaassaaq aligornik minguitsunik qillalaartunik aappallorinnik pisinani, oqaluttuassartalinnik piujuartitsinermillu aallaaveqartumik tuniniaanissaq.  

Nunatsinnimi aatsitassarsiorneq inatsisitigut piumasaqaatitaqaqaaq, soorlu piaaffiit eqqaanni avatangiisit illersorneqarnissaat, sulisut taakkulu atugaasa nunarsuup sinnerani piiaaffinni atugassarititaasunit pitsaanerunissaat.

- Kalaallit Nunaani ujaqqanik pinnersaasiassanik piiaaneq ileqqorissaarfiuvoq nunaqavissunillu peqataatitsiffiulluni. Taamaammat rubinit pisoqaassusaat sumilu piiarneqarsimanerat pilerisaarutaalluarsinnaasoq isumaqarpunga, Kristoffer Szilas oqarpoq.

Ujaqqalli pinnersaasiassat nalingi nikerartaqisut taassuma erseqqissaatigaa. Pitsaassutsimmi saniatigut pinnersaasiassap qanoq piumaneqartiginera aallaavigalugu nalilersuisoqartarpoq.  

Pinnersaatilli tunuliaqutaanik ilisimasaqarnissaq pinnersaateqartartut akornanni mutinngorluttuinnarpoq.

Assersuutigalugu pinnersaataarniarfik Pandurop aligornik aappaluttunik tungujortunillu sanaanik ussassaaruteqartarpoq. Ujaqqallu pinnersaasiassat nunatsinneersut taakkununnga unammillersinnaasariaqarput.       

- Rubinit Kalaallit Nunaanneersut rubinilianit allanit pitsaanerusinnaanerat inunnut tuniniaanermi tunngavilersuutigineqarsinnaavoq, Kristoffer Szilas oqarpoq.