Aasaanerani tammarsimaarneq immikkooruteqartoq: Nammineq kajumissutsiminnik ikiuuttut ilaqutariillu eqqakkanik piiaasut
Peqatigiiffik 'Kalaallit Meerartaat' Nanortalimmi Kullorsuarmilu meeqqanut, inuusuttunut ilaqutaannullu 2019-imili aasaanerani tammaarsimaartitsisarpoq. Tammaarsimaartitsineq pisarnertut nuannisarfiuvoq – ilaqutariilli namminerlu kajumissutsiminnik suleqataasut Kullorsuarmi ukioq manna allamik nutaamik sammisaqarput.
Naak nammineq kajumissutsiminnik suliaqartut nunarsuarmit tamalaanit nunaqarfeeqqamiittoqartarnera initusaraluartoq suli initunerusoqarpoq.
Nunaqarfimmimi eqqakkat upernaap aasallu ingerlanerani amerlingaarmata takunngitsoorneqarsinnaanngingajapput.
Kullorsuarmi najugaqartoq, Camp Kullormilu nammineq kajumissutsiminik suliaqartoq Aviaaja Danielsen oqarpoq.
- Nunaqarfimmi pisuttuarujoortarpunga. Ukioq mannali eqqakkat ajorluinnarput. Maajimili eqqakkanik eqqaavissuarmut assartuinerit arlaqanngillat, - assut tipeqarput aamma peqqissutsimut ulorianarput, taanna peqatigiiffiup 'Kalaallit Meerartaata' tusagassiuutinut nalunaarutaani oqarpoq.
Ajornartorsiutaasumut ataatsimut suliniuteqarneq
Taamaammat frisbeemik, isikkamik arsamik ilaqutariittullu nuannisarnikkut pinnguaateqarneq upernaakkut torersaanermik taarserneqalaarpoq.
Eqimattat ATV-t, eqqaavissiat torersaanissamullu kajuminneq sakkugalugit ulluni arlalinni eqqagassarpassuit qaleriiaassimasut torersarpaat.
Helene Dørup Tuluit Nunaanni najugaqaraluarpoq, taannali nunat tamalaat akornanni nammineq kajumissutsiminik suliaqartut ilagaat, taassumalu isumassarsiap qanoq pinngorsimanera oqaluttuaraa:
- Ullaakkut ataatsimeeqatigiinnerit ilaanni, nunaqarfimmiut nunanillu tamalaaneersut ullaat tamaasa ingerlattagaanni eqqakkanik katersinermik suliaqarsinnaanerluta eqqartorparput. Kajumissutsiminnik suleqataasut nunanit tamalaaneersut arlaqartugut ingerlatsisinnaanermut allagartaqarpugut taamaaliornikkullu aaqqiissutissarseqataasinnaalluta, taanna oqarpoq.
Ingerlatsisinnaanermummi allagartat aasaanerani tammaarsimaartoqannginnerani torersaanissamut uniffiliisimapput.
Kommunimimi sulisut ATV-nik eqqagassanik eqqaavissualiaassinissamut atorneqartartunik, ingerlatsinissamut allagartaqanngillat, taamaammat eqqakkat uninngatiinnarneqarput.
Torersaaneq isummertitsisoq
Tamannali tammaarsimaarfimmi ilaqutariit namminerlu kajumissutsiminnik suliaqartut aporfiginngikkaat, Helene Dørup oqarpoq:
- Kullorsuarmi kommunimilu innuttaasut assut qiimapput, suleriallaqqeqalutik inussiarnisaaqalutillu. Peqataaffigalugu isumaqaqaaq, taanna oqarpoq.
Kullorsuarmi aasaanerani tammaarsimaarnermi sammineqartartutulli pinnguarnissamut piffissaqaleriataarpoq.
Naak tammaarsimaarneq ullumikkut naammassigaluartoq aamma nammineq kajumissutsiminnik suliaqartut angalasartut ilaqutariillu najugaqartut imminnut inuulluaqqoreeraluartut Aviaaja Danielsenip torersaaqatigiinnermik suliaqarneq nunaqarfimmi eqqagaannaanngitsunik siunissami suliaqarnissamut isummertitsisimassasoq neriuutigaa:
- Neriuppunga taamatut suliniuteqarneq tamatsinnut takutitsissasoq innuttaasut nammineerlutik suliniuteqartarnerat allanngueqataasinnaasoq, aammalu kingusinnerusukkut nunaqarfimmi unammilligassat allat taamatut iliuuseqarfigisinnaassagivut, eqqagassanik piiaaneruppat allaappalluunniit, Aviaaja aaqqissuisunit tusagassiuutinut nalunaarummi oqarpoq.
