Eqqagassalerinermi ajornartorsiutit: Avannaata Kommunia immikkut akuersissuteqarfigineqartoq
Avannaata Kommuniani eqqagassat amerligaluttuinnarnerat pissutaalluni kommunimi tassani illoqarfinnut nunaqarfinullu 24-nut ammaannartumik ikuallaasinnaanissamut naalakkersuisut immikkut ittumik akuersissummik tunniussipput.
Avannaata Kommuniata siunissamut ungasissumut eqqagassalerinermut pilersaarusiorluni ingerlalluarsimanera matumani peqqutaavoq.
Nunalerinermut, Imminut Pilersornermut, Nukissiutinut Avatangiisinullu Nalaakkersuisoqarfik taama ilisimatitsivoq.
Ikuallaavinni avatangiisinut akuerisani eqqagassanik ikuallassinnaasunik ikuallaasoqartassaaq. Naalakkersuisulli kommunalbestyrelsenip qinnuteqarneratigut sivisunerpaamik eqqakkanik ikuallanneqarsinnaasunik ammaannartumik ikuallaasarnissamut qaammatini pingasuni immikkut ittumik akuersissuteqarsinnaapput.
Avannaatalu Kommunia akuersissummik taamaattumik maanna tunineqarpoq:
- Ammaannartumik ikuallaasarnerit periarfissat kingullersaattut atortuartussaavagut. Siusinnerusukkut kommunimut ammaannartumik ikuallaasarnissamut immikkut ittumik akuersissuteqartarnermi piumasarineqarpoq, eqqagassat passunneqartarnerinut tamakkiisumik aaqqiissutissanik pilersitsinissaq sulissutigineqassasoq piumasarineqartarpoq, tamannalu kommunimit malinneqarsimanngilaq; maanna pilersaarut nassiunneqartoq tamanna naammassineqarpoq. Taamaattumik Avannaata Kommunia ammaannartumik ikuallaasarnissamut akuersissutaagallartumik tunineqarpoq, Avatangiisinut Naalakkersuisoq Kalistat Lund oqarpoq.
Eqqagassalerineq pitsaanerusoq
Kommunip eqqagassalerineq isumagisassaraa, naalakkersuisullu eqqagaassalerinermut suliassaqarfik pingaartitaraat. Kommunit tamatumunnga atatillugu unammilligassaat pillugit tusarniaaffiginiarlugit Kalistat Lundip kommunit tamaasa tikeraarpai.
Kommunit tamarmik ilisimatinneqarput, ukiuni 2024-2025-mi kommunit tamarmik immikkut eqqagassalerinermik pitsanngorsaanissamut tapiiffiginiarlugit 3 millionit koruunit tikillugit tunineqarsinnaasut.
- Qaammat kingulleq nuna tamakkerlugu eqqagassalerinermi ataatsimut aaqqiissutissani ikuallaavik siulleq atulerpoq. Ikuallaaviit eqqagassalerinitta annertoorsuarmik pitsaanerulernissaanut, taamaalilluni ammaannartumik ikuallaasarnerit pisariaarunnissaannut qulakkeerisussaapput. Ammaannartumik ikuallaasarnerit peqqissutsimut avatangiisinullu annilaanganartortaqarput, Kalistat Lund tusagassiorfinnut nalunaarummi oqarpoq.
Sumiiffinni ukunani ammaannartumik ikuallaasarnissamut immikkut ittumik akuersissutaagallartumik nalunaaruteqartoqarpoq:
- Qaanaaq nunaqarfiillu Qeqertat, Savissivik aamma Siorapaluk.
- Upernavik nunaqarfiillu Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.
- Uummannaq nunaqarfiillu Ikerasak, Niaqornat, Qaarsut, Ukkusissat aamma Saattut.
- Ilulissat nunaqarfii Oqaatsut, Qeqertaq, Saqqaq, aammalu Ilimanami anartarfiit puussiartaat imaqanngitsut.
Kommuninut immikkut ittumik akuersissummik tunisisarneq ingerlateqqinneqassanngitsoq naalakkersuisut erseqqissaatigaat, kommunit eqqagassalerinermut pilersaarutitik malillugit ingerlalermata.
