Nunatta avannaani eqqagassanik ajornartorsiuteqarneq aaqqiivigiuminaatsoq

Ikuallaaviup malinnaasinnaannginnera sikoqarneralu pissutigalugu Esanip umiarsuisa tikillutik aallersinnaannginnerat pissutigalugit nunatta avannaani nunaqarfinni eqqagassat amerliartuinnavipput.

Nunaqarfinni eqqagassanik ikuallaasinnaanissamut akuersissuteqarnissaq aaqqiissutissaasoq, Avannaata Kommuniani borgmesteri, Palle Jeremiassen (attaviitsoq) isumaqarpoq. Borgmesterili taama akuersissuteqarfigineqarnissamut arlaleriarluni itigartinneqarpoq.

- Aajangiisinnaaguma nammineq, ilaana ikuallassagaluarpagut, Palle Jeremiassen oqarpoq.

KNR-imit nunaqarfinni Niaqornaarsunni Kullorsuarmilu aqquserngit killingani eqqakkanik eqqagassanillu ulikkaartut ulluni kingullermi oqaluttuaraarput. Ajornartorsiutaasumulli kina akisussaasuunersoq maannamut suli isumaqatigiissutigineqanngilaq.

- Ikuallaaqqusaajunnaarnerup kinguneranik nunaqarfipput alianaatsorsuaq Kangerlummiikkami, taamatut massakkut mamianartumik kanngunartumillu inisseqqavoq, Kristianne Jeremiassen nunaqarfini Niaqornaarsuk pillugu KNR-imut siusinnerusukkut oqarpoq. Kullorsuarmit Timotheus Petersen assingusumik aamma oqariartuuteqarpoq.

Eqqakkalli amerliartuinnaraluartut Palle Jeremiassen eqqakkanik nunaqarfinni ikuallaanissamut arlaleriarluni itigartitsivigineqarpoq.

- Inatsisitigut Naalakkersuinikkullu massakkut itigartitaaqqavugut ikuallaanissamut. Aamma allamilluunniit sumik iliuuserisinnaasatsinnik innersuussinatik ikuallaaqunngilaatigut, taanna oqarpoq.

Iliuuseqarfigiuminaallutillu mingutsitsinerungaatsiartut

Nunarput tamakkerlugu eqqagassanik isumaginnittumi Esanimi pisortap kommunit eqqagassat poortuisinnaappata eqqakkat Nuummi ikuallaavimmut assartorneqarsinnaasut pqaatigaa.

Aaqqiissut taanna Kommune Qeqertalimmit toqqarneqarsimasoq, borgmesterip Ane Hansenip (IA) paasissutissiisutigaa.

- Siulleq pereerpoq, taava tullissaa juunip naalernerani pisussaq, taanna Niaqornaarsummut aamma aallertussaavoq, taanna oqarpoq.

Anartarfinniilli igittakkanik eqqagassat borgmesterit marluk pingaartumik aaqqiissutissarsiuminaatsillugit oqaatigaat. Taakkumi puussiartaat peqqinissamut ulorianaateqartutut naliliiffigineqarlutik immikkut akuersisoqarsimatinnagu aamma ikuallanneqarsinnaangillat.

- Taakkua qanoq iliuuseqarfiginissaat ajornakusoortorujussuuvoq. Aamma ikuallanneqangippata tassa katersuinnartariaqartarpagut, taamaalillutillu avammut teqqalertarlutik mingutsitsineq annertooq aamma piulertarluni, Palle Jeremiassen oqarpoq.

Kommunit eqqakkanik ikuallaanissamut itigartitaajuartillugit ajornartorsiutaasut qanoq aaqqiivigineqarsinnaanerat pillugu naalakkersuisoq akisussaasoq Kalistat Lund KNR-imit oqaaseqartikkusukkaluarparput.

Taassuma borgmesterit eqqagassalerinermut akisussaasuusut innersuussutigaa, kommunilli ikuallaanissamut akuersissuteqarfigineqarnissamut qinnuteqarpata akuersissuteqarnissamut piareersimalluni apriilimi oqaatigaa.