Upernarnerani aput aattulermat kingumut eqqagassarpassuit saqqumiinnartut
Kiatsippat niviugappassuaqalernissaa tipersuarlu naamaneqarsinnaalereersoq Niaqornaarsummi Kullorsuarmilu ajornartorsiutaapput. Upernarneranimi aput aattulermat kingumut eqqagassarpassuit saqqummernerat Avannaani nunaqarfiit ilaanni innuttaasut tujormissutigaat.
Tassa Niaqornaarsummi eqqakkat aputip aanneratigut saqqummikaanerat nunaqarfinni aqutsisuni ilaasortap Niaqornaarsummeersup Kristianne Jeremiassenip mamiagalugillu kanngunarnerarpai:
- Ikuallaaqqusaajunnaarnerup kinguneranik nunaqarfipput alianaatsorsuaq Kangerlummiikkami, taamatut massakkut mamianartumik kanngunartumillu inisseqqavoq, taanna oqarpoq.
- Tipersuaq, kiisalu aasarluarnerani quperlut, niviugappassuit aqqutigalugit, illersorfissaqanngitsumik suliffeqarput taakani eqqaavilerisut, Kristianne Jeremiassen aamma oqarpoq.
Niaqornaarsummiit avannarparterutta Avannaata Kommuniani kommunalbestyrelsimut ilaasortap Kullorsuarmeersup Timotheus Petersenip, nunaqarfimmi taama nittarsaannissaa avaanngugigaluarlugu, eqqakkat inoqatinut attaveqatigiittarfitsigut takusassiarai.
- Aap, tassa paaseqquara, avaanngunaraluaqaaq nunaqarfipput avammut taama nittarsaatissallugu. Kisianni allaqqussinnaangilaq isertuutiinaraluarutsigu saqqummiunnaveersaarlugu piviusoq, suli ajornerusumik kinguneqartussaavoq, Timotheus Petersen oqarpoq.
ATV-nik ingerlatsisuussagaanni allagartaqarnissaq piumasaqaataasoq
Kullorsuarmi eqqagassat perusuersartarfiillu puussiarsuit qernertut ATV-nik assartorneqartaraluaramik ATV-nik ingerlatsisuussagaanni allagartaqartariaqarnera piumasaqaataammat, quut annallu maanna aqquserngup killingani aamma katersuutiinnaleqqapput.
- Tassa arlaatigut ikiorneqanngikkutta immaqa ukiuni tulliuttuni eqqaavissuarput torersisinnaanngilaq, Timotheus Petersen aamma oqarpoq.
Kommuneqarfiit ataasiakkaat eqqagassalerineq nammineerlutik isumagisassarigaat, nunarput tamakkerlugu eqqagassalerinermut piginneqatigiiffimmi ESANI A/S-imi pisortaq Frank Rasmussen oqarpoq.
Assersuutigalugu Niaqornaarsumi eqqakkat poortorneqarnissaat Kommune Qeqertaliup isumagisinnaappagu ESANI-p umiarsuaaniit aaneqarsinnaasut, Frank Rasmussen oqarpoq.
ESANI-p umiarsuaa qaammatit marluk qaangiuppata eqqakkanik aallerluni Kommune Qeqertalimmukaqqissasoq, taanna aamma oqarpoq.
Nammineerlutik qanoq iliuuseqalersaartut
Kullorsuarmiut nammineerlutik qanoq iliuuseqarnissaminnik pilersaaruteqarput.
- Nunaqarfiup siulersuisui arfininngornermi aggersaapput suliffeqarfinnik, tamanna ajornartorsiut eqqartuiffeqatigiiffiginiarlugu. Neriuppunga arlaatigut eqqartueriarlutik kommunalbestyrelsimut anngussiumaartut, Timotheus Petersen oqarpoq.
Nunaqarfittaminni immikkut ittumik akuerineqarnikkut eqqakkanik ikuallaasinnaanissamut Naalakkersuisunut saaffiginnittaraluarlutik, Avannaata Kommuniata borgmesteria Palle Jerimiassen oqarpoq.
Avannaata Kommunia ESANI-mut ilaasortaangilaq, ESANI-lli umiarsuaata eqqakkanik aallertarnissaa pillugu kiffartuussinissamut isumaqatigiissuteqarput. Avannaa sikusartumiimmat sikuerpat eqqakkanik aallertoqarnissaa pilersaarutaasoq, ESANI-mit kommunimillu oqaatigineqarpoq.
