Aasaanerani sammisassaqartitsineq ataqatigiinnermik pilersitsisartoq
Peqatigiiffik Kalaallit Meerartaat Kullorsuarmi Nanortalimmilu aasaanerani sammisassaqartitsinermik ukioq manna aaqqissuusseqqissaaq.
Naalli sammisassaqartitsineq meeqqanut tunnganerugaluartoq – tamanna ilaqutariinnut tamanut nuannisarfiusarpoq.
- Meeqqanut inersimasunik pinnguaqatiginnittoqarusunneranik takutitsinissaq pingaarnerpaavoq. Inersimasut pimoorussisut, meerarpaluttut tamatumalu saniatigut pinnguaatinik torrattunik ilinniartitsisut.
Illoqarfinni taakkunani marlunni aatsaat siullermeertumik aaqqissuussisoqalinngilaq – Maria Brix Rasmussen aamma aatsaat siullermeerluni Kullorsuarmi aasaanerani sammisassaqartitsinermi aqutsisuulinngilaq.
Taanna 2019 aallartimmalli peqataalerpoq, taassumalu illoqarfiup meerartaat ukiut tamaasa pinnguaqataalluartarnerat oqaluttuaraa:
- Meeqqat tamangajammik takkuttarunarput. Kisianni meeraannaanngillat takkuttartut. Aamma angajoqqaat aanaakkullu ernuttaminnik issiaqateqarlutik titartaaqataasarput. Taamaammat maani Kullorsuarmi ataqatigiilluartoqarneranik pilersitsisoqartoqarpasittarpoq, Maria Brix Rasmussen oqarpoq.
Meeqqat aasaanerani sammisassaqartitsinermi ilaatigut basketballersinnaasarput, sangaaqqerisinnaapput pinnguaatinillu pinnguarsinnaasarlutik.
Sammisassaqartitsineq tamanut ammasuuvoq. Aamma inersimasunut. Taamaammat naak mikinerusunut tulluarnerugaluartoq illoqarfimmiunut tamanut aamma ammasarpoq:
- Tamanut ammavoq. Kingullermik inersimasut pimoorussilluarput assersuutigalugu basketimik unammisitsinermi peqataarusupput. Tamanna nuannerluinnarpoq, aamma aaqqissuussap annertuup nammineq kajumissutsimik aaqqissuussaanera pissutigalugu.
Kulturimik pinnguarnermillu avitseqatigiinneq
Aasaanerani sammisassaqartitsinerit nunatsinnit nammineq kajumissutsiminnik aaqqissuussisuinnaanngillaq. Aamma ilaatigut Hong Kongimit, Serbiamit, Mexicomit, Tjekkiamit Polenimiillu peqataasoqartarpoq. Meeqqat taamaalillutik pinnguaatinik nutaanik taamaallaat ilinniarnatik kulturimik allamik aamma ilikkagaqartarput:
- Sammisassaqartitsinerit ukua kulturit assigiinngitsut suleqatigiinnissaannik aamma anguniagaqarnerupput. Nunaqavissut muminganiillu taamaalillutik nunanit tamalaanit aamma ilikkartoqartarpoq. Tassa kulturimik avitseqatigiittarpugut. Kalaaliminertortarpugut, kalaallisut oqaatsinik ilinniartarpugut, Maria Brix Rasmussen oqarpoq, nangillunilu:
- Meeqqat tamanna aamma takusinnaavaat. Tassa assigiinngikkaluaqaluta immitsinnit ilinniarfigisinnaavugut. Tamatta naleqarpugut. Tamanna nammineq kajumissutsimit suliaqartunut uatsinnut aamma meeqqat akornanni atuuppoq.
