Naluttartut klubbiat naluttarfiup matunissaa pissutigalugu ilungersuasoq
Naluttarfeqanngitsumi naluttartoqatigiiuniaraanni ajornakusoortorujussuussaaq.
Nuummi Naluttartut Klubbiannut pissutsit taama ajornaatsigisumik nassuiarneqarsinnaapput.
Nuummimi naluttarfik Malik iluarsartuunneqartussaavoq – taamaalillunilu ukioq ataaseq tikillugu – matoqqatinneqassalluni. Tamannalu naluttartut peqatigiiffiannut naluttarfimmik sapaatip akunneranut ullunik sisamanik atuisartumut ilungersuatitsivoq.
- Aap, pikkunaapajaartoq oqaatigineqarsinnaavoq, Nuummi Naluttartut Klubbianni siulittaasoq, Karl Zinglersen oqarpoq.
Piffissamimi sivisuumi matoqqatitsisoqarnissaa pissutigalugu naluttartut peqatigiiffiata nalunnermik sungiusarnermillu ukiut 20-t ingerlanerani ineriartortitsisimanermi ilarujussua annaaratarsinnaavaa.
Taamaammat siunissaq siulittaasup, Karl Zinglersenip ernumanartippaa.
- Naluttarfimmimi sinaakkutit pituttorsimaffigingaatsiarpagut. Taakkulu unitsipiloorneqarpata taava klubbi sussava? Taamaalillutami aamma uagut unitsinneqarallassaagut. Qanoq ililluta taava aallarteqqissaagut tamaanillu ingerlatsiinnarluta? Taanna aperivoq.
Nammineq kajumissutsiminnik suliaqartut tammartut
Naallu naluttarfiup qaqugu qanorlu sivisutigisumik matoqqanissaa suli aalajangerneqarsimanngikkaluartoq tamatuma kinguneri Nuummi Naluttartut Klubbianni malugineqarsinnaalereerput.
Naluttartummi pikkorissut namminerlu kajumissutsiminnik ikiuutaasartut arlallit tammariartulerput.
Tamannalu naluttarfiup piffissami ammaqqinnissaanut peqatigiiffimmik ingerlatsiniarnissamut suliaqarniarnissamullu qularnanngitsumik ajornakusoortitsilluinnassasoq, Karl Zinglersen nassuiaavoq.
- Namminermi kajumissutsiminnik suliaqartut ikiliartorpata soorunami ajornartorsiutaangaatsiassaaq. Nammineq kajumissutsiminnik suliaqartoqarnissaa taakkulu piginnaasaqaannarnissaat pisariaqartilluinnarpagut. Kisianni soorunami sungiusaasulluni sungiusaaffissaqarluni nuannernerpaasarpoq, inuusuttunimmi aamma nallorissoqarpoq. Piffissamilu sivisuumi matoqqatitsisoqarnerani attassinissaq ajornakusuulaarpoq.
Nunanut allanut unammisartut sungiusaasuata, Jonas Tetzchnerip danskit klubbianni sungiusaasutut atorfininnini pissutigalugu Danmarkimut ukiup ingerlanerani nuunniarluni ilaatigut aalajangersimavaa.
Sungiusaasoqarnermilu piginnaasamik annertuumik Nuummit annaasaqarnerusoq, Karl Zinglersen oqarpoq.
Jonas inuusuttuulluni danskit nunanut allanut unammisartuiniissimavoq, taamaalillunilu nalunnermi teknikkikkut piginnaasanik nassaareriaannaanngitsunik piginnaasaqarpoq, taanna oqarpoq.
Inuusuttut soqutiginnitsiinnarniarnerat ajornakusoortoq
Inuusuttut nalukkiarsinnaannginneranni nalunnermik soqutigisaqartiinnarniarnissaat aamma unammillernangaatsiassaaq.
Peqatigiiffiummi pikkorissunik sungiusaaneq ineriartortitsinerlu iluatsilluarsimagaluarpaa. Maannali annaajartulerlugit, Karl Zinglersen oqarpoq.
- Inuusuttummi soqutiginnilertarput. Taamaammat periarfissaqarunnaarlutik sussanerlutik takusinnaajunnaarlugu soqutiginnikkunnaassapput. Taamaalillutik allanik ujartuilissallutik.
Naluttartullu siulittaasuata tassunga atatillugu inuusuttut timersornermik unitsitsivinnatik timersuummik allamik ujaasinissaat neriuutigiinnassavaa.
- Inuusuttut sungiusartarnerminnik attassiinnarnissaat neriuutigaarput. Immaqa klubbimi allami. Timersornerup silarsuaaniikkunnaannginnissaat qarasaasiallu imaluunniit Ipad-ip saavaniinnerulinnginnissaat neriuutigaarput. Tamanna ajornartorsiutaanerpaavoq, Karl Zinglersen oqarpoq.
Taamaammat naluttarfik Maliup matoqqanerani inuusuttut unittuunnginnissaat Nuummi Naluttartut Klubbiata iliuuseqarfiginiarpaa.
- Ataatsimeersuarnermi inuusuttunut qanoq sammisaqartitsisinnaanissarput oqaluuseraarput. Immaqa crossfit, eqaarsaarneq imaluunniit tasitsaarnerit. Kisianni soorunami timersortarfimmi piffissamik pissarsisinnaanissarput soorunami pisariaqarpoq, Karl Zinglersen oqarpoq.