Aqqaneq-marlunnik ukiulik Aima aalajangereerpoq: Naluttarfik matuinnartoq aallassaanga

- Timit sannerseqattaassavat. Tigoriarlugu nutsussavat! 

- Ingerlaannaritsi, nalunnermik nuna tamakkerlugu sungiusaasoq Jonas Tetzschner naluttut qulit sinneqartut naluffissiami uteqattaartut saallugit peqqusivoq. Nalunaaqutaq 18.48-nngorpoq, inersuullu kiassusaa 26 gradiusoq allaqqavoq. 

Naluttarfimmi malimmi sungiusarneq qangali aallartippoq.

Nalutsilluni qaqugukkut anersaartortarnissamik ilinniarnermi sungiusaasup peqqusineri ilaanni sakkortukujussinnaagaluartut pisariaqarput. Aerob, sungiusakkat tassa taaguutaa. Timi imermiitillugu qasujaallisaaneruvoq, qaqugu nalunnermik ilinniartoq unammeqataasaleruni pitsaanerpaamik angusaqarniassammat.

Tullianimi januaarimi unammiartortoqartussaavoq, Nunarput sinnerlugu naluttartut arlallit Reykjavik International Games-imi peqataassallutik. 

Nuna tamakkerlugu sungiusaasoq kajumissutsiminnillu ikiuuttartut ikioqatigiinnermikkut Nunatsinni pikkorilluinnartunik ullumikkut naluttartoqalersimavugut, Nuka Vittus Petersen nassuiaavoq. Assi © : Anders Rytoft

Sapaatit-akunneranni arlaleriarluni sungiusartoqartarpoq, kisianni naluffissiami annerpaami sungiusarnerat, naluttarfik iluarsaanneqalerpat, pisinnaassanngilaq. Matusigallarnissaq suli ullulerneqanngilaq, kisianni iluarsartuussineq qaammatini qulit aqqaneq-marlullu akornanni pissaaq. 

Sungiusaasup naluttartut marlussuisut, tingisarfiup nalaani qasuersaartut saariarlugit kaammattuerpalaartumik oqaluutilerpai. Oqaluussaasa ilagaat Aima Petersen aqqaneq-marlunnik ukiulik.

Aima nalunnermik ilinniarfimmi februaarimi aallartittoq qaqeqqammerpoq.

- Naluttartuulluni nuanneqaaq, imeq timiminit kuserusaartillugu, qiimmattarpoq. 

Nalunngilaali naluttarfik arlaanni matugallarumaartoq, kisianni Aima Petersen uniinnarusunngilaq. Nuummimi nalussinnaanngikkuni Danmarkimut nuukkusuppoq. Tassa taama nalunneq inuttaanut pingaaruteqartigaaq.

- Sammisaq nutaaq nuannaralugu aallukkaanni uneriataarnissaq sapernassaaq.

Aima Petersenip ataataa, Nuka Vittus Petersen, sikiimivoq. 

- Sapaatit-akunneri tamaasa nalunnermik sungiusariarsinnaanngikkutta, taava Danmarkimut nuunnissaa ilaquttavut suleqatigalugit isumagisariaqassavarput, oqarpoq Aima qungujullugu. 

Aima Petersen aana imermiippoq ataataalu Nuka Vittus Petersen pingasunngornerni sapaatinilu sungiusaaqataasarpoq. Assi © : Anders Rytoft

Kakkaak. Sakkortuallaanngila. Soormi arsaannermik, assammik arsarnermik imaluunniit allarluinnarmik aallussileruni?

- Jo, arsaanneq, karaterneq timersuutillu allat misilereerpakka, Aima Petersen oqarpoq, iluatsissimannginnerarpaali.

- Taava naluttalerpunga, nuannarisorujorujussuullugulu.

Aperigatsinni naluttartuunermini suna angorusunneraa, akivoq:

- Unammersuarnerit annersaannut soorlu OL-imut ilaaneq. Nalluttartutut kakkattuulluni nuanneruluussaaq. Kakkassigaluttuinnarnissaq aamma.

Aima Petersenimi nallorissuuvoq. Naluttartuulluni ukioq ataaseq suli naanngikkaluaraa piginnaaneqarnera malunnarpoq. Naluttartunummi pikkorinnersiukkanut Nanoq-mik taasanut ilanngunnissaa sivisujunnaarpoq. 

- Tassa angajoqqaatut kissaaterput, kisianni pinngitsaalinngisaannarparput, ataataa erseqqissaavoq.

- Nuannareqaami. Danmarkimut aallartittariaqassagutsigu akueriuminaalaarsinnaagaluarpoq, allatulli ajornassaaq, Nuka Vittus Petersen, pingasunngornikkut sapaatikkullu sungiusaaqataasartoq oqarpoq. 

Nikallungassutigaalu, ikinngutimi, naluttarfik iluarsaanneqalerpat, unittariaqarnissaat.

- Ingerlalluaqqoqaakka, neriussaangalu Nuummi aaqqiissuteqartoqarumaartoq.

Ajorpoq

Nunatta nallorissortai arlallit Danmarkimi sungiusariartussanngoreerput. Tallimat missaanniittut Aima Petersenip sungiusaqatigisartagarai, angajulliunerulaartut, efterskolemut timersornerusumik aallutalimmut aasaru 2024-imi nuuttussatut allatsissimasut.

Aimalu kisimi nikallunganngilaq. Nalunnermik nuna tamakkerlugu sungiusaasoq Jonas Tetzschner ippassaq apersoratsinni, matusigallarnissaq tassaanerarpaa. "Tamanna ajorluinnarpoq".

- Nammineq kajumissutsiminnik nalukkiartartut meeqqalluunniit kingornatigut takkuteqqinnissaat kialuunniit neriorsuutigisinnaanngilaa. Taakku ataatsimoorfinnik nutaanik, timersornerusariaqanngitsunik nassaassapput. Tamanna inuiaqatigiinnut pitsaanngitsorujussuusaaq.

Taanna ilanngullugu oqarpoq:

- Maligassiuisummi aamma peerneqassapput. Naluttartuutigilersimasatsinnik pissarsiniarneq piffissaq sivisoorujussuunikuuvoq. Ukiut qulit sulissutigineqarpoq. Taava aallaqqaataaneeqqissaagut? Tamanna qasunartoq oqaatigisinnaavara.