Silaginnera ilaasussarpassuit aallarartippai – pujorli ilimasaarutigineqaqqittoq
![](/sites/default/files/styles/image_934x467/public/2023-11/7V9A7626-Enhanced-NR.jpg?itok=aJ8Go3UN)
Siniffinni patitsittakkani unnuinerit taamaatitseqattaarnerillu. Aasaanerani sulinngiffeqarnerminni angalasut sapaatip akunnerata siuliani ilungersunartorsiorput.
Maannali iluaallannerorpasippoq.
- Ullumikkut kisiat eqqarsaatigigutsigu neriulluarpugut, timmisartuussinerit ilarujussui naammassisinnaassarpasippagut. Silagippoq, Air Greenlandimi attaveqaqatigiinnermi siunnersorti, Heidi Møller Isaksen oqarpoq.
![](/sites/default/files/styles/image_934x467/public/2024-07/IMG_3785.jpg?h=dc37dbac&itok=mcyEkn1B)
Tamatuma saniatigut timmisartuutileqatigiiffiup assartugassat tamarmik taamaatitseqattaarnerit pissutigalugit uninngatinneqartariaqarsimasut assartornissaannut aaqqiissutissarsivoq. Ataasinngorneq juulip arfineq-pingajuanit sapaammi (ippassaq) ualernissaanut taamaatitsinerit 136-upput.
- Ullumi Kangerlussuarmiit assartorneqartussat prammimiit ingerlanneqassapput Nuummut, Heidi Møller Isaksen oqarpoq.
Nuummiit nunatta kujataanut assartugassarpassuit aamma nassiunneqarput, Qaanaamut Pituffimmullu qulimiguulimmik aamma assartuisoqarpoq.
Pujoq angalanissamullu pilersaarutit nutaat
Naak ullumi seqinnarikkaluartoq sila suli mumeriaataarsinnaavoq. Air Greenlandip timmisartuussinissaata 51 procentii ippassaq naammassineqanngillat, taamaammat ippassaq ilaasussat sisamararterutaat sinnerlugit sunnigaapput.
Aqagulu suli qularnarneruvoq. Heidi Møller Isaksenip nunatta kitaata ilarujussuani tunumilu putsernissaa ilimasaarutigineqartoq oqaatigaa. Tamannalu sapaatip akunnerata siuliatulli ilungersunartorsiortitsilersinnaavoq.
- Ullumikkut nuannaartigaluguta aqagumut aamma ernussuteqarpugut, Heidi Møller Isaksen oqarpoq.
- Neriuppugut pujornissaa aarlerusaarutaasoq imaaniiginnassasoq, taamaalilluta timmisartuussisinnaassalluta.
Ataasinngorneq juulip arfineq-pingajuanit sapaat juulip 14-ianut timmisartuussinermi ilaasussat 3700-it sunnerneqarput. Angalasussat kangittooqqasut 2010-mi innermik anitsisup arsai pissutigalugit kanngittooqqatigisoqarmalli aatsaat taama amerlatigeqqipput. Islandimi Eyjafjallajökull taamani innermik anitsimmat timmisartuussinerit tamarmik unitsinneqarput.
Ilaasussat 3700-it ilarparujussui maanna ingerlaqqereerput, sinnerilu apuuffissaminnut apuutingajalersinnaanissaat neriuutigineqarpoq.
- Kikkut tamarmik angalanissaminnut pilersaarummik nutaamik pissarsisimassapput. Taamaammat taakku sapaatip akunnerata ingerlanerani naammssinissaat neriuutigaarput, Heidi Møller Isaksen oqarpoq.