FN atortussiat pissarsiariuminaatsut pillugit malitassanik suliaqartoq: Nunatsinni misilittakkanik assersuutissaqarpoq

Atortussianik pissarsiariuminaatsunik piaanermi atuinermilu Naalagaaffiit Peqatigiit malitassanik nunarsuarmi nukissiorfinnik ataavartunik atuinermut ikummatissanillu atuiuinnaariartulersaarnermut pingaarutilinnik suliaqaleruttorput.

Ataatsimiittartoqatigiit innersuussusiortussat taaneqarput Panel on Critical Energy Transition Minerals, tassanilu ilaasortat 40-pput. ICC-ip siulittaasua Sara Olsvig taakkununnga ilaalerpoq.

Nunap inoqqaavisa pisinnaatitaaffii najoqqutassiassani ilaatinneqarnissaat taassuma immikkut ukkatariniarpaa.

- Nunarsuarmioqatigiinni aatsitassat ilisimaneqartut akornanni 54 procentii nunap inoqqaavisa nunaanniillutillu nunaasalu qanittuaniittut ilisimaneqarpoq, taamaammallu aatsitassanik piiaasoqarniaraangat naluneqanngilaq nunat inoqqaavinut toqqaannartorujussuarmik sunniuteqartartoq sunniuteqassasorlu aamma siunissami.

- Taamaammallu uannut uani suliami pingaarnerpaajuvoq malitassani suliarineqartussani nunap inoqqaavisa pisinnaatitaaffiisa tamakkiisumik akuutinneqarnissaat aamma tamakkiisumik malitassani suliarineqartussani ilanngunneqarnissaat angussallugu, Sara Olsvig oqarpoq.    

Naalagaaffiit Peqatigiit Nunat Inoqqaavisa Ataavartumik Ataatsimiititaliaata siulittaasorisimasaa, Dario Mejía Montalvo, peqatigalugu Sara Olsvig FN-ip ataatsimiittartoqatigiiviniittussatut toqqagaavoq.

Siornatigut kukkussutaasut aaqqinneqassasut

Nunatsinni aatsitassarsiorneq qangali oqallisigineqartarpoq – GEUS-imi naapertorlugu atortussiassat 500-nit ikinnerunngitsut nunatsinni nassaassaapput.  

Taamaattumik malittarisassiornermi nunatsinni pisimasunik assersuutissaqissoqarpoq.

Illua´tungeriit Pingasut Akornanni Isumaqatigiissut (IBA) naalakkersuisut isumaqatigiissutaat Sara Olsvigip erseqqissaatigaa. Taanna isumaqatigiissut aatsitassarsiortoqassatillugu nunami innuttaasunut iluaqutaasarnissaanik qulakkerinnissaaq. Ilaatigullu kalaallinik sulisoqarnissamik innuttaasullu aatsitassarsiornermi suleqataasussat ilinniartinneqarnissaannik qulakkeerinnissaaq.    

Taanna isumaqatigiissut suliffeqarfiup aatsitassarsiulinnginnerani suliffeqarfiup aatsitassarsiortussap, kommunip aamma Namminersorlutik Oqartussat akornanni isumaqatigiissutigineqassaaq. 

- Nunat allat qiviaraanni taamaattoqanngivittarpoq amerlasuutigut, naalagaaffiit aatsitassarsiorfiillu akornanni isumaqatigiinniartoqaraangat nunat inoqqaavi akuutinneqanngivittarput amerlasuutigut.

- Taamaammallu isumaqarpunga nunatsinni aamma misilittakkat ilaat uani atorluarneqarsinnaasut, aammali erseqqissassavara nunatsinni aatsitassarsiorneq eqqarsaatigalugu aamma nunat inoqqaavisa pisinnaatitaaffiisa eqquutsinneqarnissaat pillugu suli suliassaqartoqarpoq, taanna oqarpoq.

Naalagaaffiit Peqatigiit FN-ip ataatsimiittartoqatigiivi malitassanik nutaanik suliaqartuusut Københavnimi sapaatit akunnerata siuliani ataatsimiipput. Assi © : Det danske udenrigsministerium

Nunap inoqqaavi nunani allani aatsitassarsiornissamik isumaqatigiinniarnerni ilaatinneqanngikkajuttut,  Sara Olsvig oqarpoq.

Taamaammat malitassat nutaat siornatigut kukkussutaasunik aaqqiinissamik qularnaarisooqataassasut, taanna oqarpoq. Tassa soorlu aatsitassarsioqatigiiffiit naalagaaffiillu aatsitassarsiornermit iluanaaruteqartuni iluaqutissarsisunilu kisiartaassanngillat.

- Nunat aatsitassarsiorfiulersaarfiusut inuisa aatsitassarsiulersaarnermit toqqaannartumik sunnerneqartussat inuiattut tamakkiisumik akuerineqarsimanissaat akuutinneqarnissaallu pingaarpoq, taanna oqarpoq.

Malitassat nutaat suliarineqaleruttortut piareereeriarpata Naalagaaffiit Peqatigiit New Yorkimi septembarimi ataatsimeersuarneranni saqqummiunneqassapput. Taakkua saqqummiunneqareerpata atuutilertussatut akuerineqassanersut, Naalagaaffiit Peqatigiit qullersaata António Guterresip aalajangertussaassavaa.