Københavnip Kangerlussuullu akornanni timmisartukkut aqqut nutaaq ammassasoq

Nuummi mittarfik nutaaq novembarip 28-ani ammassaaq. Taamaammat ulloq taanna aallarnerfigalugu timmisartorsuit Kangerlussuakkoornatik illoqarfiit pingaarnersaatigoortalissapput.

Timmisartorsuilli nunatta kitaani nunaqarfimmiit piivinnavianngillat. Air Greenlandimmi Albatros Arctic Circlellu suleqatigiinnissamik isumaqatigiinneratigut Kangerlussuup Københavnillu akornanni sapaatip akunneranut marloriarluni timmisartuussisoqartassaaq.

- Kangerlussuaq takornarianit tikissallugu kajungerineqartaqaaq, ukiumut tassani takornariartut 10.000-t missaanniittarlutik. Takornariat taakku tassaakkajunnerupput, nunatta qeqqani avannaaniluunniit angalanerminni, takornariarnermik aallartinnerani naggaserneraniluunniit Kangerlussuarmi takornariartut, Air Greenland tusagassiuutinut nalunaarummi allappoq.

Takornariartitsivik Albatroc Arctic Circle Kangerlussuarmi sulisitsisut annerpaata ilagisaat 100-it missaannik sulisoqarpoq. Takornariartitsivimmi pisortap, Jørgen Larsenip Kangerlussuarmi takornariaqarnerup ineriartortinneqarnera 2000-ikkut aallartinneraniilli sulissutigilerpaa, taamaammat nunaqarfiup Københavnimut Københavnimullu toqqaannartumik angalaffigineqarsinnaalernissaa tupinnanngitsumik oqiliallaatigaa.

- Kangerlussuaq maani najugaqartunut sulisunullu pingaarutilerujussuuvoq. Isumaqatigiissuteqarnitsigut sulisutta suliinnarsinnaanerat, nunaqarfittalu piujuarlunilu ineriartoqqissinnaanera qulakkeerparput. Tamassuma pingaaruteqassusaata nipituuliutigineranut nukippassuit atorpagut, tassami Kangerlussuaq tassaavoq nunatsinni takornarianik tikinneqartartut annerit tulliat, taanna tusagassiuutinut nalunaarummi oqarpoq.

Ataasinngornikkut sisamanngornikkullu tikittoqartassasoq

Aqqut nutaaq 2025-mi marsip 17-iannit 2025-mi oktobarip 16-iannut ammassaaq.

Jet Timelu silaannakkut angallassisuussalluni.

Timmisartoq Københavnimiit ataasinngornerit tamaasa 16.30 aallartassaaq, Kangerlussuarmullu nalunaaqutaq 18.20 tikittassalluni. Tamatuma kingorna Nuummut ingerlaqqittassaaq.

Timmisartoq aqaguani Nuummiit Kangerlussuarmut 07.45 aallaqqittassaaq, sivikitsumillu uninngariarluni Københavnimut ingerlaqqittassalluni.

Ssisamanngornerit aamma taama timmisartuussisoqartassaaq. Assigiinngissuteqalaaginnarporli, tassa Kangerlussuarmut nalunaaqutaq 19.30 aallartassaaq, sivikitsumillu uninngariarluni nalunaaqutaq 20.55 Københavnimut ingerlaqqittassalluni.

Qaqortumi Ilulissanilu mittarfiit kinguaattoortut

Atlantikoq qulaallugu timmisartuussinerit Nuummut novembarip 28-ani nuunneqarpata Kangerlussuarmi mittarfik nunatsinnit pigineqarlunilu ingerlanneqassasoq naalakkersuisut danskillu naalakkersuisuisa siorna apriilimi isumaqatigiissutigaat.

Ilulissanit Ilulissanullu atlantikoq qulaallugu 2026-mit timmisartuussisoqartalissaaq.

Qaqortumi mittarfik 2026-mi aamma piariissasoq, pisortap oqaatigaa. Ilulissani Qaqortumilu sanaartornerit kinguaattooqqapput.