Ilaasut avissaartuupput: Angalanermi Kangerlussuaq qarsutiinnarneqarsinnaalilerpoq
Nuummi nunanut tamalaanut mittarfissaq ukioq ataaseq qaangiuppat piariissaaq. Novembarip ulluisa 28-anni 2024 ammarnersiorneqarnissaa pilersaarutaavoq.
Mittarfittaaq 2.200 meterisut takitigisumik mittarfeqassaaq taamaalillunilu timmisartut angisuut, soorlu Air Greenlandip timmisartua atlantikumik qulaassisartoq Tuukkaq illoqarfiit pingaarnersaanni missinnaallunilu qangattarsinnaassalluni.
Danmarkip Kalaallit Nunaatalu akornanni angalanerni Kangerlussuaq siunissami taamaammat qaangiinnarneqarsinnaalissaaq.
Angalasut Kangerlussuarmukartussat KNR’ip naapippai, taakkulu Nuummi nunanut tamalaanut mittarfissap periarfissanik neqeroorutigisinnaasai nuannaarutigineqaqalutik.
- Toqqaannartumik angalasinnaalernissara qilanaarivara. Kangerlussuaq aqqusaarlugu angalaneq piffissartortorujussuusarpoq, taama oqarpoq Sequssuna Schmidt, erninilu Kuuno Stavangerilialersut, tassani Kuunop arnaa Ivaana Holm assammik arsarluni VM-eqarnerani unammeqataasussaalluni.
Periarfissat nutaat
Air Greenlandimik siunissami angalasarnissani nunani allani tikitassani Danmark kisiartaajunnaassaaq. Angalatitseqatigiiffiup nalunaarutigaa nunat tikinneqarsinnaasut amerlanerulissasut. Ilaasullu tamanna qilanaaraat.
- København kisiat tikitassaajunnaarpat sumut angalasinnaalernissarput pissanganarpoq, Paarnaq Larsen Strøm, Danmarkimut ilinniariartussaq oqarpoq.
- Timersortartut sinnerlugit qilanaarpunga. Isaasalerlugu, nunat allat qaninnerulissapput, immaqalu Danmarkimi unamminerit qaninnerulerlutik, Sequssuna Schmidt oqarpoq.
Danmarkimulli angalanermi Kangerlussuup aqqutaaniikkunnarnissaa tamanit nuannaarutigineqanngilaq.
- Kangerlussuaq nuannaraara, tassunga tikittarunnaarnissaq taamaammat uggornarpoq. Toqqaannartumilli attaveqalerneq pitsaasuuvoq Kangerlussuarli maqaasissavara, Paarnaq Larsen Strøm oqarpoq.
Ukiumik ataatsimik kinguaattoorneq
Nuummi nunanut allanut mittarfik ukioq manna piareersimasussaasimagaluarpoq, kisianni ilaatigut Covid-19 kinguaattoorutaasimalluni.
- 2019-imi aallartikkatta mittarfik 2023-mi atuutilertussaasimagaluarpoq. Ukiumik ataatsimik ajoraluartumik kinguaattoorpugut, massakkulli ukioq ataasiinnanngorpoq, Kalaallit Airportsimi suliniutinik aqutsisoq, Aviaaja Karlshøj Knudsen oqarpoq.
Timmisartoq atlantikumik qulaassisartoq Tuukkaq Danmarkimit Nuummi novembarip 28-ani meqqaassaaq.
Kisianni tikittarfissaq aallartarfissarlu aappaagu maajimi atorneqalereersimanissaa naatsorsuutigineqarpoq.
Kalaallit Airportsimit oqaatigineqarpoq Ilulissani Qaqortumilu mittarfissat ammarneqarnissaat suli ullulerneqarsimanngitsut