Qaqortumi mittarfissap illorsuassaanik sanaartortussarsisoqartoq

Sanaartugassiissutinik suliarinnittartut, KJ Greenland, Qaqortumi mittarfissami aallartarfiutigaluni tikittarfissamik, timmisartut ingerlaarnerannik alaatsinaallunilu nakkutilliisoqarfissamik illorsuartassanillu sanaartuisussanngortitaapput.

Kalaallit Airports tugassiorfinnut taama nalunaarput.

Isumaqatigiissusioqqammernertik, Kalaallit Airportsip suliniutinut pisortaata Aviaaja Karlshøj Knudsenip nuannaarutigaa.

- Neriuutigisatsinniit suliarinera sivisunerusimavoq ajornakusoornerusimallunilu. Maannakkulli suliassami isumaqatigiissutit anginerusut kingullersaat anguarput illorsuartassaalu aamma aallartissinnaalerlugit, tamannalu soorunami nuannaarutigaarput oqiliallaatigalugulu, taanna oqarpoq.

Tassa Ilulissani aamma mittarfissuassaliortut KJ Greenlandimeersut Qaqortumi mittarfissap illorsuassaanik sanaartuisussanngortitaapput. Taamaammat suliassartik naammassilluarumaaraat, Kalaallit Airportsip qularinngilaa.

Isumaqatigiissusioqqammernertik, KJ Greenlandip aamma nuannaarutigaa.

- Tamanna uagutsinni KJ Greenlandimi aamma suliassaavoq annertooq pingaaruteqartorlu, akisussaaffigileratsigulu nuannaarutigaarput. Ilulissani illorsuartassat sanaartorlugit ingerlallualereerpugut, tassanilu arlalippassuarnik iluaqutaasunik misilittagaqalereerluta atorluarsinnaasatsinnik.

- Taamaammat Qaqortumi suliassaq aamma kivissinnaagipput qularinngilarput aallartinnissaalu qilanaaralutigu, KJ Greenlandip pisortaa Karl Jensen oqarpoq.

KJ Greenlandikkormiut Qaqortumi mittarfissuap illorsuartassaanik upernaaru sanaartulertussat 2025-mi decembarimi naammassissangapput. Taamaammat Qaqortup mittarfissaa 2026-p aallartinnerani ammassangatinneqarpoq.

Qaqortup 2023-p naaneranili mittarfeqalernissaa pilersaarutaagaluarpoq.

- Ilisimaneqartutut illorsuartassaanik sanaartornermi akigititassat isumaqatigiissutiginissaasa inissitsinnissaat pilersaarutaasunit sivisunerusumik ingerlanneqarpoq. Taamaattumik piffissamut pilersaarutip pingaarnerup annertuumik kinguaattoorfiusussaannginnera nuannaarutigisorujussuuarput, tamannami soorunami suliassamut, Kalaallit Nunaannut aammalu KAIR-imi uagutsinnut aalajangiisuulluinnartumik pingaaruteqarpoq, Aviaaja Karlshøj Knudsen oqarpoq.