Naalakkersuisut Qaqortumi mittarfiup 2025-mi piareernissaa naatsorsuutigaat
Inatsisartuni qinikkat aappaagumut aningaasanut inatsit sapaatip akunnerata siuliani isumaqatigiissutigaat.
Tamatuma kingunerisaanik Qaqortumi mittarfiup piviusunngornissaanut alloriartoqaqqippoq, suliniummummi tassunga aningaasassarsiorneq iluatsinneqarpoq.
Mittarfik politikerit neriuutigisaat eqquutissappat 2025-mi piariissaaq.
Naalakkersuisut tusagassiuutinut nalunaarummi taama paasissutissiipput.
AAMMA ATUARUK Aningaasanut inatsit tusarlugu Qaqortormiut qummoroortarlutillu aqqusinermi erinarsorrattut
- Isumaqatigiissutit siammasissumit ikorfartorneqartut aalajangiinitsinnik siunissamut qulakkeereqataapput, maannalu Kalaallit Nunaata kujataani innuttaasut kiisami siumut isigisinnaalerput, aningaasaqarnermut naalakkersuisoq, Naaja Nathanielsen nalunaarummi oqarpoq.
Ullulernissaanulli Kalaallit Airport Domestic A/S-ip suliariumannittuuniartullu akornanni isumaqatigiissuteqartoqarnissaa apeqqutaavoq.
Naalakkersuisuusimasut mittarfimmik sanaartornissamut missingersuusiarisimasaat malillugit suliariumannittussarsisoqannginnera pissutigalugu suliniut unittoornikuuvoq.
Air Greenland aamma Tusass
Aningaasanulli inatsit nutaaq isumaqatigiissutigineqartoq atorlugu pilersaarutip piviusunngortinneqarnissaanut nutaamik missingersuusiortoqarpoq.
Pilersaarutip piviusunngornissaanut Aningaasanut inatsimmi 462 millionit koruunit immikkoortinneqarput.
Aningaasat taakkua amerlanersaat landkarsimiit matussuserneqassapput, ingerlatsivinnili Namminersorlutik Oqartussat pigisaanni aningaasartuutissatut missingersuutit partiit qimerlooreerlugit aningaasartuutissatik naammassivaat.
Air Greenlandimit 65 millionit ataasiarluni tigusassatut atorneqassapput, aningaasat taakku coronap tuniluunneranut atatillugu oqartussat timmisartuussinissaanut immikkoortitaapput.
Tamatuma saniatigut politikerit Tusassimit ukiuni 2026-mit 2028-mut 150 millionit koruuninik atuisinnaassallutik naatsorsuutigaat
Narsarsuup siunissaa
Nunatta kujataani mittarfik piviusunngorpat tamanna Narsarsuarmi mittarfimmut nunallu immikkoortuata sinneranut kinguneqartussaavoq.
Tamanna suleqatigiissitamit misissorluarneqassasoq, ineqarnermut attaveqaasersuutinullu naalakkersuisoq nutaaq, Mariane Paviasen (IA) oqarpoq.
AAMMA ATUARUK Aalisakkat mittarfissaq piviusunngortissagaat: Qaqortumi mittarfissaq ima aningaasaliiffigineqassaaq
- Borgmester Stine Egede suleqatigalugu Narsarsuup siunissaa pillugu suleqatigiissitap aallarteqqinnissaanut suliniuteqarpunga, Mariane Paviasen nalunaarummi oqarpoq, nangillunilu:
- Ataatsimoorluta innuttaqatigut tamaasa ikorfartussavagut, aammalu siunissami oqaloqatigiinnissarput, Kommune Kujalliup tamarmiusup Qaqortumi mittarfissaq pillugu Naalakkersuisunut inassuteqaataannik aallaaveqartoq tatigeqatigiiffigaarput.
