Aningaasanut inatsit tusarlugu Qaqortormiut qummoroortarlutillu aqqusinermi erinarsorrattut

Partiit sisamat aningaasanut inatsit sisamanngormat atsioqatigiillutik akuerissutigaat. Partiit sisamat, Inuit ataqatigiit, Naleraq, Atassut kiisalu Demokraatit tassa aappaagumut aningaasanut inatsimmi ilanngussat amerlaqisut isumaqatigiissutigaat.

Assersuutigalugu sineriammut qanittumi qaleralittanut akitsuut atorunnaarsinneqassaaq. Taanna akitsuut ukiumut 16 millioni koruuninik landskarsimut isertitaqassutaasaraluarpoq.

Aalisariutaatillit umiatsiaararsortullu nuannaarutissaqartut ilagaat marlunnik qaleralinniutilik, Haansi Ortu Sandgreen, taannami sinerissallu qanittuani qaleralinniartut allat tunisaminnik akitsuutinut aappaagumiit akiliisarunnaassapput.

AAMMA ATUARUK Partiit sisamat aningaasanut inatsit pillugu isumaqatigiittut

- Uanga nammineerlunga nuannaarutigaara peerneqamat. Pissutigalugu uanga aamma tamanna siornakkunnili sukataarutigijuaannarnikuugakku, Inatsisartut fiskeriudvalgiannut allaat allaqattaartarlungalu pigama, qanoq iliorneqarniarnersoq apeqqutigalugu killiffissiorlugillu. Taava ukioq manna aappaagumut aningaasanut inatsisip saqqummiunneqarnerani peerneqartussanngortoq saqqummiunneqarmat soorunami nuannaarpunga, taanna oqarpoq.

Haansi Ortu Sandgreenip Ilulissaneersup, nammineerluni naatsorsuinera naapertorlugu, sinerissap qanittuani qaleralinnut akitsuutip 2017-imi atulerneranit ullumimut 1,5 millioni koruunit qaleralinnut akitsuummut akiliutigereerpai. Akitsuummulli akiliisarunnaarnermigut aappaagu iluanaaruteqarnerusalissaaq.

Kujataani taxartartoq borgmesterilu mittarfittaarnissamut qilanaarput

Sisamanngornermi unnukkut arfineq pingasunut Qaqortormiut nuannaaqisut illoqarfiup qeqqani mittarfittaartussanngoramik nuannapput, tamatuma kingorna biilerpassuit illoqarfik aamma kaajallappaat.

Taxaatilik Thomas Egede aamma nuannaarpoq:

AAMMA ATUARUK Kalaallit Airports Qaqortumi mittarfik pillugu: Aallarteqqissinnaanngorpugut

- Taxat ingerlalluarnissaat isumalluaatigaa aammalu Qaqortumi inerisaanissaq qilanaaralugu, uummaallaatigissagamiuk.

Kommune Kujallermi borgmesteri aamma nuannaarpoq.

- Tassa soorunami Kommune Kujallermiut sinnerlugit nuannaartorujussuuvunga.

- Inuussutissarsiortut alloriarusuttut taamaalilluta sinaakkutissaannik suliaqarnissatsinnut maannakkut piviusunngornissaa upperalugu aallartisarsinnaanngussagatta, Stine Egede (IA) oqarpoq. 

Qanoruumi ilanngutassiaq qulaani takuuk.