Kalaallit Airports Qaqortumi mittarfik pillugu: Aallarteqqissinnaanngorpugut
- Maani Kalaallit Airportsiminngaanniit soorunami nuannaarutigisorujussuuvarput massakkut inissittoq. Aamma piareersimavugut suliaq taanna massakkut aallarteqqinnissaa, Kalaallit Airportsimi suliniutinut pisortaq, Aviaaja Karlshøj Knudsen oqarpoq.
Qaqortumi mittarfiuliornissamut pilersaarutip suliariumannittussarsiuunneqarnera arlaleriarluni iluatsinngitsoq kiisami massakkut inissilerpasippoq.
Kalaallit Airportsip naalakkersuisuusimasut missingersuusiaat atorlugit suliffeqarfinnut mittarfimmik sanaartornernissamik marloriariarluni suliariumannittussarsiuussinera iluatsinnikuunngilaq.
Politikerit mittarfimmik sanaartornissamut 462 millionit koruuninik aningaasanut inatsimmi maanna inissiipput, Kalaallit Airportsillu oqarnera naapertorlugu Qaqortumi mittarfimmik 1.500 meterimik takissuseqartumik sanaartornissamut aningaasat kiisami naammalerput.
Aningaasat naammalerpat?
- Naammassapput, massakkut maani Kalaallit Airportsiminngaanniit utaqqerallaannarparput piginnittup (Naalakkersuisut aaq.) ataatsimeeqqatigiissutiginissarput paasilluarlugu qanoq aningaasat inissinneqassanersut, suliniutinut pisortaq oqarpoq.
Aasamut aallartissinnaasoq
Ammassanniarnermit, Air Greenlandimit Tusassimiillu isertitanik mittarfiup nutaap sanaartornissaa ilaatigut akilerneqarsinnaassaaq.
Kalaallit Airportsip mittarfiup sanaartornissaanut suliassaq siulleq aasamut aallartissinnaassallugu neriuutigaa.
Kalaallit Airportsilli siuliniutinut pisortap mittafiup qaqugu piareersinnaanissaata oqaatiginissaa siusippallaarnerarpaa.
- Massakkut paasilluaqqaartariaqarparput qanoq aningaasartai inisissippiarsimanersut qanorlu Kalaallit Airports aningaasat tigussaneraat. Kisianni siullermik piginnittut naapeqqaalaartariaqarpagut taava pilersaarut naammassineqarluassaaq. Neriuutigivarput upernaareerpat sanaartorneq aallartinneqarsinnaassasoq, Aviaaja Karlshøj Knudsen oqarpoq.
Qaqortumi mittarfik nutaaq Inatsisartut 2018-imi mittarfiliornissamut pilersaarutaasa ilagaat.
Nunatsinni mittarfiit nutaat pingasut sanaartorneqartussaapput. Nuummi Ilulissanilu nunanut allanut timmisartuussinissamut mittarfiit marluk. Qaqortumilu mittarfik nutaaq nunatta iluani pingaarnertut atorneqartussaq.
Deloittemit misissueqqissaarneq naapertorlugu Qaqortumi mittarfik 1.500 meterinik takissuseqartut, 1,044 millionit koruuninik akeqassaaq.
Aningaasaqarnermut naalakkersuisup partiit sisamat peqatigalugit aningaasanut inatsit Qaqortumi nutaamik mittarfiliornissamut qulakkeerisoq sisamanngornermi isumaqatigiissutigaat.
