Illersornissaqarfik Kangerlussuup mittarfianik ukiuni pingasuni atuinermut akiliissasoq

Illersornissaqarfik atlantikoq qulaallugu mittarfik Nuummut novembarimi nuuppat Kangerlussuup mittarfianik atuinermut akiliuteqassaaq.

Allattoq Helle Nørrelund Sørensen

juulip 02-at 2024 12:35

Illersornissaqarfik Kangerlussuarmi mittarfimmik atuinissaminut ukiuni tulliuttuni pingasuni akiliisassaaq.

Danskit illersornissamut ministeriat Troels Lund Poulsen Folketingip Kalaallit Nunaat pillugu ataatsimiititaliaanit folketingimut ilaasortap Aaja Chemnitzip (IA) apeqquteqaataanut akissuteqaammini taama ilisimatitsivoq.

- Tamanna tunngavigalugu illersornissaqarfiup Kalaallit Nunaanni mittarfimmik atuiinnarnissamut akkiliisarnissaanut atugassarititaasut pillugit ukiunut pingasunut isumaqatigiissutaagallartumik suliaqartoqarpoq, akissummi allassimavoq.

Aamma atuaruk Illersornissamut ministeri: Issittumi Sakkutooqarfik Kangerlussuarmi suliaqarnerulissaaq

Naalakkersuisut danskillu naalakkersuisui juunimi isumaqatigiissuteqarallarput. Isumaqatigiissut taamaalilluni illuatungeriit isumaqatigiissutigigunikku sivitsorneqarsinnaavoq imaluunniit allanngortinneqarsinnaavoq.

Isumaqatigiissut atuutilissappat Folketingemi Aningaasaqarnermut ataatsimiititaliap ukioq manna kingusinnerusukkut akuereqqaassavaa.

KANGERLUSSUUP SIUNISSAA

Nuuk Ilulissallu 2024-mi mittarfissuaqalissapput. Taamaammat Kangerlussuup siunissaa ernummatigineqangaatsiarpoq.
Kangerlussuup inui 500-t missanniipput. Kangerlussuup mittarfia nunaqarfimmi tassani suliffissaqartitsinermut qitiuvoq.
Mittarfeqarfiit Kangerlussuup mittarfianik piginnittuupput.
Kangerlussuaq sakkutooqarfinngussasoq, politikkikkut 2023-mi apriilimi isumaqatigiissutaavoq. Naalakkersuisut siulittaasuat Múte B. Egede (IA), ineqarnermut attaveqaatersuutinullu naalakkersuisuusimasoq Erik Jensen (S) Danmarkillu illersornissamut ministeria Troels Lund Poulsen (V) isumaqatigiissummik taassuminnga atsiortuupput.
Nunarput Kangerlussuup mittarfianik piginnittuuinnassasoq, isumaqatigiissummi tassani allaqqavoq.
Danmarkip illersornissaqarfia USA-lu Kangerlussuup mittarfianik atuisinnaasassasut, isumaqatigiissummi aamma allaqqavoq.
Mittarfik sakkutuut timmisartorinngisaannut mittarfittut aamma atuutiinnassaaq. Mittarfeqarfiit tamatumani aamma akisussaasuuinnassapput.
Kangerlussuup sakkutooqarfinngornissaata Danmarkip illersornissaq pillugu 2023-mi ukiakkut isumaqatigiissutaanut ilanngunneqarnissaa isumaqatiginninniutigineqaqqissaaq.
Takornariartitsiviup Albatros Arctic Circle Aps-ip akunnittarfik, Kangerlussuaq Hotel, 2023-mi aggustimi pisiaraa. Mittarfeqarfiit Hotel Kangerlussuarmik piginnittuunikuupput. Akunnittarfik taanna 61-inut siniffissaqartitsivoq.

Allisiguk

Danmark Kangerlussuarmi mittarfimmik atuinissamut qanoq akiliitigisassanersoq illersornissamut ministerimit akissuteqaammi ersarissarneqanngilaq.

Kangerlussuarmi sakkutuut suli suliaqarnerussasut

Naalakkersuisut danskillu naalakkersuisuisa atlantikoq qulaallugu timmisartut Nuummut novembarip 28-ani nuunneqarpata Kangerlussuarmi mittarfik nunatsinnit suli pigineqarlunilu aqunneqassasoq siorna apriilimi isumaqatigiissutigaat. Timmisartut taakku Ilulissaniit Ilulissanullu 2026-ni aamma angalasalissapput.

Sakkutuujunngitsut Kangerlussuup mittarfianut suli mittarsinnaallutillu aallartarsinnaassapput, tamannalu Mittarfeqarfiit akisussaaffigissavaat.

Danskit USA-llu illersornisaqarfiisa mittarfimmik atuisinnaanissaat danskillu illersornissaqarfiata mittarfimmik aserfallassimaqisumik iluarsartuussinissaa taamani aamma isumaqatigiissutaavoq.

Aamma atuarukUSA Kangerlussuarmi mittarfimmut akiliisariaqanngitsoq

Troels Lund Poulsen Issittumi Sakkutooqarfiup nunaqarfimmi najuunnerunissaa kissaatigalugu upalungaarsimanermut Kangerlussuarmi ilinniarfittaaq maajimi tikeraaramiuk nalunaarpoq.

- Illersornissaqarfiup Kalaallit Nunaanni tassalu aamma Kangerlussuarmi suliaqarnerulernissaa sillimaniarnermut tunngasutigut pingaarpoq. Taamaammat Issittumi Sakkutooqarfiup ilaatigut Kangerlussuarmi qanoq suliaqarnerutigilissanersoq misissorparput, taanna tusagassiuutinut nalunaarummi oqarpoq.

Tusagassiuutinullu nalunaarummi tassani nunanut allanut tunngasunut naalakkersuisup, Vivian Motzfeldtip (S) illersornissamut nutaamik isumaqatigiissusiornissat qilanaaralugit oqaatigaa.

Illersornissaqarfiup Issittumi 2033-mut najuunnissaanut aasakkut sulinngiffeqarnerup kingorna isumaqatigiissuteqartoqarnissaa naatsorsuutaavoq.

Nutaarsiassami kukkunermik nassaarsimaguit uunga allaffigineqarsinnaavugut.