Illersornissamut ministeri: Issittumi Sakkutooqarfik Kangerlussuarmi suliaqarnerulissaaq

Issittumi Sakkutooqarfiup Kangerlussuarmi suliaqarnerulernissaa, Danmarkip naalakkersuisuisa kissaatigaat. Qanorli suliaqarnerulertigissanersoq oqaatiginngilaat.

Allattoq Helle Nørrelund Sørensen

maajip 06-at 2024 14:11

Nutserisoq Hanne Petersen

Issittumi Sakkutooqarfik Kangerlussuarmi arlalitsigut suliaqarnerulissaaq.

Danmarkip illersornissamut ministeria Troels Lund Poulsen (V) tusagassiorfinnut upalungaarsimanermut Kangerlussuarmi ilinniarfittaap ippassaq sapaammi ammarnerani taama nalunaarpoq.

- Illersornissaqarfiup Kalaallit Nunaanni tassalu aamma Kangerlussuarmi suliaqarnerulernissaa sillimaniarnermut tunngasutigut pingaarpoq. Taamaammat Issittumi Sakkutooqarfiup ilaatigut Kangerlussuarmi qanoq suliaqarnerutigilissanersoq misissorparput, taanna oqarpoq nangillunilu:

- Illersornissaqarfik suliaqarneruleriarpat Kangerlussuup siunissaa ineriartorneralu ernumanarunnaassasoq qularinngilara.

Kisianni Issittumi Sakkutooqarfik qanoq suliaqarnerulertigissanersoq, Troels Lund Poulsenip ilisimatitsissutiginngilaa.

Tamannali naalakkersuisullu illersornissaq pillugu isumaqatigiissusiornissamut ilanngullugu aatsaat isumaqatigiinniutigileruttorpaat.

Kangerlussuup inui suli akissutissiisut

Nuummi mittarfissuassaq novembarimi ammarpat, Kangerlussuup mittarfia nunarsuup sinneranut silaannakkut angallaffittut qitiujunnaassammat, Kangerlussuup siunissaa inuisa qangali ernummatigaat.

Illersornissaqarfilli nunallu allat NATO-mi ilaasortat Kangerlussuarmi mittarfimmik atuisassasut taakkualu akiligaannik mittarfik nutarterneqarlunilu aserfallatsaaliorneqartassasoq, nunatta Danmarkillu siorna uparnaakkut isumaqatigiissutigaat.

KANGERLUSSUUP SIUNISSAA

Nuuk Ilulissallu 2024-mi mittarfissuaqalissapput. Taamaammat Kangerlussuup siunissaa ernummatigineqangaatsiarpoq.
Kangerlussuup inui 500-t missanniipput. Kangerlussuup mittarfia nunaqarfimmi tassani suliffissaqartitsinermut qitiuvoq.
Mittarfeqarfiit Kangerlussuup mittarfianik piginnittuupput.
Kangerlussuaq sakkutooqarfinngussasoq, politikkikkut 2023-mi apriilimi isumaqatigiissutaavoq. Naalakkersuisut siulittaasuat Múte B. Egede (IA), ineqarnermut attaveqaatersuutinullu naalakkersuisuusimasoq Erik Jensen (S) Danmarkillu illersornissamut ministeria Troels Lund Poulsen (V) isumaqatigiissummik taassuminnga atsiortuupput.
Nunarput Kangerlussuup mittarfianik piginnittuuinnassasoq, isumaqatigiissummi tassani allaqqavoq.
Danmarkip illersornissaqarfia USA-lu Kangerlussuup mittarfianik atuisinnaasassasut, isumaqatigiissummi aamma allaqqavoq.
Mittarfik sakkutuut timmisartorinngisaannut mittarfittut aamma atuutiinnassaaq. Mittarfeqarfiit tamatumani aamma akisussaasuuinnassapput.
Kangerlussuup sakkutooqarfinngornissaata Danmarkip illersornissaq pillugu 2023-mi ukiakkut isumaqatigiissutaanut ilanngunneqarnissaa isumaqatiginninniutigineqaqqissaaq.
Takornariartitsiviup Albatros Arctic Circle Aps-ip akunnittarfik, Kangerlussuaq Hotel, 2023-mi aggustimi pisiaraa. Mittarfeqarfiit Hotel Kangerlussuarmik piginnittuunikuupput. Akunnittarfik taanna 61-inut siniffissaqartitsivoq.

Allisiguk

Kangerlussuarmili mittarfik Namminersorlutik Oqartussanit suli pigineqartuusoq sakkutuujunngitsunik timmisartuussinermut suli atorsinnaavoq. Kangerlussuarmili mittarfik tamatumunnga qanoq atorneqartigissanersoq suli aalajangerneqanngilaq.

Suli aalajangiisoqannginnera Kangerlussuarmiut ilaasa noorarnerannik kinguneqartoq, ukiaq oqaluttuaraarput.

Aamma atuarukInui noorariaannaasut: Mittarfissuit atulerpata Kangerlussuaq matussava?

Kangerlussuulli siunissaanik aamma aarlerinninngitsoqarpoq. Takornariartitsiviummi Albatrosip akunnittarfik Hotel Kangerlussuaq Mittarfeqarfinniit siorna aggustip aallaqqaataani tiguaa.

Akunnittarfik taanna Kangerlussuup mittarfiata eqqaniippoq, Kangerlussuullu takornariaqarnerulernissaa qularinngikkitsik Albatros akunnittarfiup pisiarinerani ilimatitsivoq.

Illersornissaqarfiup Kangerlussuami suliaqarnerata nunatta inuinut aamma iluaqutaanissaa pingaartoq, naalagaaffinngornissamut nunanullu allanut tunngasuni naalakkersuisoq Vivian Motzfeldt (S) oqarpoq.

- Illersornissaqarfiup nunatta kissaatai naapertorlugit nunatsinni qanoq suliaqarnerulertigissaneranik isumaqatigiissusiornissatsinnut qilanaarpunga, taanna oqartoq Danmarkip illersornissamut ministereqarfiata tusagassiorfinnut nalunaarutaani allaqqavoq.

Vivian Motzfeldt illersornissamik isumaqatigiinniarneq pillugu oqaloqatiginiartaaraluarparput, sulili akissuteqarnani.

Nutaarsiassami kukkunermik nassaarsimaguit uunga allaffigineqarsinnaavugut.