Hotel Kangerlussuaq tunineqarpoq
Maajimi Hotel Kangerlussuaq tuniniarneqalerpoq. Akunnittarfik kitaani nunaqarfimmi mittarfimmut toqqaannartumik atassuteqarpoq ukiullu ingerlaneranni angalasorpassuit inisimasorisarpai.
Massakkullu namminersortunut tunineqarpoq. Pisisoq tassaavoq ingerlatsivik Albatros Arctic Circle Aps., akunnittarfiup ingerlanneranik tigusisussanngortoq.
Mittarfeqarfiit tusagassiuutinut nalunaarummi taama allappoq.
Albatros Arctic Circle Aps. Kangerlussuarmi unnuisarfinnik ingerlatsinermi nutaajunngilaq, tassami Polar Lodge aamma Old Camp pigereeramigit. Saniatigut aamma Kangerlussuarmi Restaurant Roklubben pigaat aamma nunaqarfimmut sermersuarmullu angalaarnissanik neqeroortarlutik.
Mittarfeqarfiit manna tikillugu akunnittarfimmik piginnittuupput, taakkununngalu pingaaruteqarsimavoq pisisumik eqqortumik nassaarnissaq, pisortaaneq Henrik Estrup nalunaarpoq. Albatros Arctic Circle Aps.' -illu misilittagaqarneratigut naleqquttoq eqqorpoq.
- Taamaattumik Kangerlussuarmi akunnittarfik toqqissisimallunga tunniutissavarput, Henrik Estrup tusagassiuutinut nalunaarummi oqarpoq.
Aamma Albatros Arctic Circle Aps-ip pisortaata pisarinera nuannaarutigaa.
- Maannakkut Kangerlussuarmi ingerlatatsinnut Hotel Kangerlussuaq assut naleqquppoq, akunnittarfiullu sulisui pikkorissut peqatigalutigit Kangerlussuarmi takornariaqarnerup suli ineriartorteqqinnissaanut assut qilanaarpugut, Jørgen Larsen oqarpoq.
Pisortanit namminersortunut
Akunnittarfik tuniniarneqalerpoq Mittarfeqarfiit akunnittarfiup 5000 kvadratmeteritut annertutigisup ingerlanneranut pisussaajunnaarsinneqarniassammat.
- Akunnittarfik massakkorpiaq Mittarfeqarfinnit pigineqarlunilu ingerlanneqarpoq, taakkulu mittarfinnik ingerlatsisussaapput akunnittarfinnillu ingerlatsinermik akisussaaffeqartussaasariaqarnatik. Tamanna naalakkersuisut sivisuumik sulissutigisimavaat, namminersorlutik oqartussani Ineqarnermut Attaveqaasersuutinuullu Naalakkersuisoqarfimmi immikkoortortami pisortaq, Kenneth Bøjler maajimi KNR-imut oqarpoq.
Naalakkersuisut tunisinissamik aalajangiisuupput Mittarfeqarfiit namminersorlutik oqartussanit pigineqarmat.
Akunnittarfik har 61-inik initaqarpoq avataanilu amerlanerusunik ilaqarluni tassaasunik allaffik, quersuaq/toqqorsivik aamma pisiniarfik katillutik 5357 kvadratmeteriusut.
Aamma saniatigut sulisut tamarmik akunnittarfimmik tunniussinermi ilanngullutik nuussapput, taamalu tunisinermut atatillugu suliffitik tigummiinnassallugit.
