Akunnittarfik ilisimaneqarluartoq Namminersorlutik Oqartussanit tuniniarneqartoq

Akunnittarfiuteqarnissannik takorluugaqaruit maanna pisiniarsinnaavugut.

Kangerlussuarmimi Hotel Kangerlussuaq Mittarfeqarfinnit pigineqarlunilu ingerlanneqartoq tuniniarneqarpoq. Akunnittarfik 5000 kvadratmeterinik angissuseqartoq mittarfimmut toqqaannartumik atassuteqarpoq.

Akunnittarfik ineeqqat 61-it saniatigullu attartortitat allaffiit, quersuaq pisiniarfiillu ilanngullugit 5357 kvadratmeterimik angissuseqarpoq.

Naalakkersuisut tunisinissamut piginnaatinneqalernissaannik Inatsisartuni aalajangiisoqarneratigut akunnittarfik tuniniarneqalerpoq. Piginnaatitaanerlu taanna Naalakkersuisut atorluarpaat.

Naalakkersuisuni Attaveqaasersuutinut immikkoortortaqarfiup pisortaa, Kenneth Bøjler taama paasissutissiivoq.

- Akunnittarfik maanna Mittarfeqarfinnit pigineqarlunilu ingerlanneqarpoq, ingerlatsivillu taanna mittarfinnik ingerlatsisussaavoq, akunnittarfinnillu ingerlatsinissamut akisussaanani. Tamanna Naalakkersuisut sivisuumik sulissutigaat, taanna oqarpoq.

Taassuma tassunga atatillugu namminersorluni inuussutissarsiortup Kangerlussuarmi akunnittarfimmik ingerlatsinissaa illoqarfimmut iluaqutaaginnassasoq erseqqissaatigaa.

Kangerlussuarmut takornariat

Nuummi Ilulissanilu mittarfissuassat aappaagu atuutilernissaat naatsorsuutigineqarpoq, Kenneth Bøjerilli taakku takornariat amerlassusaannut sunniuteqarnissaat Qeqqata Kommuniata naatsorsuutiginngilaa.

- Takornariat Kangerlussuarmi mittarfimmik takunniinnartarnerat paasinerlunneqalaartarpoq. Amerlasoorpassuit unnuinissaq akunnialuillu Kangerlussuarmiinnissaq toqqartarpaat, aamma nalunngilara kommunip takornariat tikittartut amerlanerulersinneqarnissaat sulissutigigaat, taanna oqarpoq.

Kangerlussuarmi takoriaqartarneranut atatillugu Sisimiut Kangerlussuullu akornanni ATV-nut aqqut 2024-p naanera piareernissaa aamma naatsorsuutigineqartoq, Netboligimi tuniniaanermik saqqummersitsinermi allassimavoq.

Tamatuma saniatigut akunnittarfik annerpaamik neqerooruteqartumik tunineqassasoq allassimavoq, aamma pisiariumannittussarsiuussisoqarneranut killiliisoqanngitsoq taamaammallu pisiniarnermi neqeroorutaasut ingerlaavartumik naliliiffigineqassasut allassimapput.

Aammali Naalakkersuisut tunisinissamik akuersissuteqartussaammata neqeroorutit tamarmik itigartitsissutigisinnaatitaagaat maluginiarneqassasoq allassimavoq.

Akunnittarfiup akia Netboligikkut tuniniaanermik saqqummersitsinermi allassimanngilaq.