Kangerlussuup siunissaanik isumaqatigiissuteqarneq: Sakkutuujunngitsunik timmisartuussinermut suli atorsinnaassaaq
Kangerlussuup siunissaa nalunarunnaamivoq.
Kangerlussuup siunissaa sivisuumik nalunarpoq. Nuummi Ilulissanilu ukiut marluk qaangiuppata mittarfissuaqalereeriarpata Kangerlussuarmi mittarfik ulapaarfiuallaarunnaassangatinneqarpoq.
Taamaammat Naalakkersuisut siulittaasuat, Múte B. Egede, Ineqarnermut Attaveqaasersuutinullu Naalakkersuisoq, Erik Jensen, Danmarkimilu illersornissamut ministeriugallartoq, Troels Lund Poulsen, Kangerlussuup siunissaanik isumaqatigiissuteqaqqammerput.
TV 2 allagaammik takutsaaliukkamik Danmarkip illersornissamut ministereqarfianeersumik februaarimi anngussivigineqarpoq, Kangerlussuarlu sakkutooqarfiulissasoq allagaammi takutsaaliukkami tassani erserpoq.
Tamannalu ilumoortoq, Danmarkip illersornissamut ministereqarfiata isumaqatigiissummi nutaami uppernarsarpaa.
Kangerlussuarli sakkutuujunngitsunik timmisartuussinermut suli atorsinnaassaaq.
Nunarput piginnittuuinnassasoq
Nunarput Kangerlussuarmi mittarfimmik piginnittuuinnassasoq sakkutuujunngitsunillu timmisartuussinermut suli atorsinnaassasasoq, isumaqatigiissummi allaqqavoq. Tarssa Mittarfeqarfiit Kangerlussuarmi mittarfimmi kiffartuussisuuinnassapput.
Illersornissaqarfik Kangerlussuarmi mittarfimmik atuisuuginnassasoq USA-lu atuisinnaassasoq, isumaqatigiissummi aamma allaqqavoq.
Tamanna qanoq aaqqiissuunneqassanersoq, Naalakkersuisut Illersornissaqarfiullu kingusinnerusukkut isumaqatigiissutigissavaat.
Illersornissaq pillugu nutaamik isumaqatigiissusiussasut
Nuummi Ilulissanilu mittarfissuassat 2024-mi ammassasut nalunaarutigineqareersorli, Kangerlussuup siunissaa ernummatigineqalerpoq.
Danmarkip naalakkersuisui illersornissaq pillugu isumaqatigiissutissatut siunnersuuteqartinnagit, Kangerlussuup siunissaa nalunarallartuassaaq. IlIllersornissaq pillugu isumaqatigiissut Sakkutooqarfik pillugu anguniakkat tunngavissallu pillugit politikkikkut isumaqatigiissutaavoq.
Danskit partiivi illersornissaq pillugu pilersaarutit malillugit aasartinnagu isumaqatigiissusiussapput.
