Qeqqata Kommunia: Kangerlussuaq pillugu paasitinneqarnissamut utaqqikatappugut
Kangerlussuaq siunissami qanoq inissisimalissava? Apeqqut tamanna Naalakkersuisunit akineqanngitsoq silaannarmi suli erfappoq.
Nuummi Ilulissanilu mittarfissuassat 2024-mi atulerpata Kangerlussuaq ullumikkut 475-inik inoqartoq nunatta avataaneersunut kisimi mittarfiujunnaassaaq.
Naalakkersuisut Kangerlussuup siunissaa suli erseqqissumik ilisimatitsinngillat.
Qeqqata Kommuniata borgmesteria Malik Berthelsen Siumumeersoq Kangerlussuup siunissaa pillugu paasitinneqarnissaminnut aamma utaqqikatappoq:
- Aap, tassa uagut Kangerlussuarmi innuttaasutuulli aamma utaqqikatappugut Kangerlussuup qanoq pineqarniarneranik Naalakkersuisut avammut oqariartuuteqarnissaannut.
SIK: Sulisartukkormiut qanoq piniarpisigit?
Kangerlussuarmi ilaqutariit sulisartukkormiut qanoq piniarpisigit?
Kangerlussuarmi ilaasortami 70-iusut siunissaat pillugu SIK-p siulittaasua Jess G. Berthelsen Naalakkersuisunut allakkatigut taama apeqquteqarpoq.
SIK-illu Kangerlussuarmi ilaasortaasa 70-it siunissami periarfissaat Malik Berthelsenip aamma oqaatigiuminaatsippaa:
-Tassami nunatta timmisartortitseqatigiiffiani mittarfimmilu sulisorpassuit kommunip avataani sulisuupput, taakkualu qanoq pineqarniarnersut suli ilisimatinnatigu naluarput susoqassanersoq.
-Tassa nalullutigu inuit qassit Kangerlussuarminngaanniit aallassanersut qassillu Kangerlussuarmiiginnassanersut, tamakku ilisimatinnatigit kommunimingaanniit iliuuserisinnaasagut killilerujussuupput.
Kangerlussuarmiut qaqugu ilisimatinneqassanersut Inatsisartuni ilaasortaq Paneeraq Olsen Naleqqameersoq Naalakkersuisunut aamma aperivoq.
Naalakkersuisut Inatsisartuni ilaasortap Paneeraq Olsenip apeqqutaanut akissumminni allapput Kangerlussuarmi innuttaasunik ukiortariitsiarpat ataatsimiititsisoqassasoq.
Illersornissaqarfiup qanoq atuinissaa apeqquterujussuusoq
PAASISSUTISSAT:
Kangerlussuaq Qeqqata Kommunianiittoq Issittup killeqarfiata nalaaniippoq, kitaata sineriaaniit 170 kilometerinik ilorpasitsigisumiilluni sermersuarmullu 30 kilometerinik silasinnerusumiilluni.
Kangerlussuaq timmisartorsuarnut nunatta avataanersunut mittarfeqarfiuvoq, mittarfia 2.810 meterinik takissusilik timmisartorsuarnit Airbus 330-itut angissusilinnit miffigineqarsinnaavoq.
Kangerlussuaq katillugit 475-inik inoqartoq umiarsualiveqarpoq, hotel-eqarluni, pisiniarfissuaqarluni, naluttarfeqarluni, meeqqeriveqarlunilu atuarfeqarpoq.
Danmarkimi illersornissaqarfiup nunatsinnilu naalakkersuisut illersornissaqarfiup Kangerlussuarmik siunissami qanoq atuinissaa pillugu isumaqatigiinniarneri maanna uninngapput Danmarkimi nutaanik naalakkersuisoqalernissaata tungaanut.
Danmarkimilu nutaanik naalakkersuisungortoqarnissaata tungaanut Naalakkersuisut Illersornissaqarfiullu Kangerlussuaq pillugu isumaqatigiinniarnerat unikkallartoq, Malik Berthelsen Naalakkersuisunit ilisimatinneqarsimavoq.
Illersornissaqarfiup Kangerlussuarmik qanoq atuiniarnera aalajangiisorujussuuss asoq, taanna oqarpoq.
Illersornissaqarfik qanoq aserfallatsaaliitigisassanersoq, mittarfillu nalinginnaasumik timmisartuussinermut atorneqassappat kikkut tassunga akisussaasuunersut aamma apeqqutaassasoq, taanna oqarpoq.
- Taakkua erseqqissumik suli avammut oqariartuutigineqarnikuunngimmata, tassa taakkua utaqqisaaginnarput.
Danmarkimi nutaanik naalakkersuisunngortoqareerpat Kangerlussuarmiunut ataatsimiititsisoqassasoq, Malik Berthelsen Naalakkersuisunit ilisimatinneqarsimanerarpoq.
