Naluttarfik matuppat ukiuni qulini piginnaasanik ineriartortitsineq asuliiginnarneqassasoq
Nuannariinnarlu peqqinnissarlu piinnarlugit naluttarfimmut Malimmut sapaatit akunnerisa tamaasa nalukkiartartut imermi kloritaqartumi ukiumi ataatsimi nalussinnaajunnaartussani kisimiinngillat.
Meeqqat inuusuttullu amerlasoorpassuit naluttartut aamma nalukkiarsinnaajunnaassapput. Tamanna ajorluinnarpoq.
Kalaallit nalunnermi nunanut allanut unammisartuisa sungiusaasuat, Jonas Tetzschner, oqarpoq.
Kommuneqarfik Sermersuup naluttarfimmik 30 millionit koruunit missaannut nutarteringaatsiarnissamik, ukiumik ataatsimik sivisussuseqassangatinneqartumik, nalunaaruteqarnerata kingorna taanna taama oqaaseqarpoq.
- Nammineq kajumissutsiminnik nalukkiartartut meeqqalluunniit kingornatigut takkuteqqinnissaat kialuunniit neriorsuutigisinnaanngilaa. Taakku ataatsimoorfinnik nutaanik, timersornerusariaqanngitsunik nassaassapput. Tamanna inuiaqatigiinnut pitsaanngitsorujussuusaaq.
Ukioqatigiiaat sisamat
Taanna ilanngullugu oqarpoq:
- Maligassiuisummi aamma peerneqassapput. Naluttartuutigilersimasatsinnik pissarsiniarneq piffissaq sivisoorujussuunikuuvoq. Ukiut qulit sulissutigineqarpoq. Taava aallaqqaataaneeqqissaagut? Tamanna qasunartoq oqaatigisinnaavara.
Nunatsinnit naluttartut pikkorinnerpaat ilaat Danmarkimi sungiusartalereerput, arlallillu 2024-mi aasaanerani efterskolernissamut timersornertalimmut allatsereerlutik. Kingulliit taaneqartut nutarterinissaq 2024-mi imaluunniit 2025-mi aallartissangatinneqartoq iluatsitsilluarlutik nalaatinngitsuulaarsinnaavaat.
Tamannali naluttartunut 2010-mi, 2011-mi, 2012-imi 2013-imilu inunngorsimasunut allatut isikkoqarpoq.
- Taakku ajutoortorujussuussapput. Taakku naluttartuunermi unitsivinneqassapput. Kisianni naluttartuuginnarniaraanni naluttarfilimmut nalunnermillu kultureqartumut nuunneq kisimi periarfissaavoq, Jonas Tetzschner oqarpoq.
Naluttarfik angallattagaq
Nunanut allanut unammisartut sungiusaasuata oqarnera naapertorlugu piginnaasaqarnermik ineriartortitsineq pingaarnerpaavoq: tassa naluttartunik ineriartortunik ingerlalluartunillu naluttartoqaannarneq. Naluttarfiulli Maliup nutarterneqarnissaata piffissalerneqarnerata tamanna unitsissavaa.
Nunanut allanut unammisartut sungiusaasuat aamma Nuuk Svømmeklubimi siulittaasoq naluttarfimmut taarsiutigalugu naluttarfik angallattagaq siunnersuutigaa. Taanna unammisaqattaarluni nalunnermut ilaatigut atorneqarsinnaagaluarpoq.
Periarfissaq tamanna nunanut allanut unammisartut sungiusaasuata akuerineqarnissaa neriuutigigaluarpaa, taamaattoqalerpasinngilarli. Ingerlatsiviup saaffiginnissummut atatillugu ajoraluartumik uterfigeqqinngikkaani, Jonas Tetzschner nassuiaavoq.
