Nalik Ventures millionilikkuutaanik sinneqartooruteqarpoq suliniutinillu maanna annertusaanialerluni
Namminersorluitk Oqartussat pigisaat Nalik Ventures A/S-ip missingersuusiaasa takutippaat 2025-mi 46,5 millionit koruuninik sinneqartooruteqartoq, sinneqartoorutit missingersuusianit amerlanerullutik.
Angusat missingersuusianit amerlanerupput nalilinnillu naleqartitsiniarnermi suliffeqarfiup aktianit aningaasaliissutinik katersukkanit ingerlatsineraneersuullutik.
Siulersuisut 2025-mut angusat iluarisimaarpaat, 2025-milu suliniutigisanut annertusaanissamut suliffinni ineriartortitsinissamut aallarnisaasunullu aningaasaliinernut periarfissiisoqarniarpoq.
Siulersuisut siulittaasuata Miki Lyngep oqarnera naapertorlugu Kalaallit Nunaanni aningaasarsiornikkut periarfissat amerliartorput, attaveqaasersuutit pitsaanerusut, nunaniillu allanit soqutiginnittoqarnerulernera periarfissiilluni.
- Piffimmi siornatigorniit periarfissaqarnerusumiippugut. Periarfissalli namminneerlutik naleqalersitsinavianngillat. Suliffeqarfiit naleqalersitsisuussapput. Taamaammat ineriartornerup pilersinneqarnissaanut suliffeqarfiit Kalaallit Nunaanneersut periarfissanik tigusinissamut tatitussuseqarnissaannik siunnerfeqarluta suliniuteqarpugut, Miki Lynge oqarpoq.
Suleqatigisat amerlanerusut
Nalik Venturesip nunanik allanik suleqateqarnini ukiup ingerlanerani amerlisarsimavai, ilisimasat, misilittakkat aningaasaliinissamullu periarfissat tassani qitiutinneqarlutik.
Kommunit inuussutissarsiorfiillu suleqatigineqarneri tamatuma saniatigut nukittorsarneqarput, nuna tamakkerlugu suliffeqarfiit aallarnisaasullu siunnersorneqarnissaq, taperserneqarnissaq aningaasaliivigineqarnissarlu pisariinnerusumik periarfissarilissagaat matumani qulakkeerniarneqarluni.
Aallarnisaasunut ingerlatsinerup IKUMA-p pilersaarusiornera ukiup naanerani naammassivoq, qinnuteqarfissarlu aallartinneqarluni. Ingerlatsineq 2026-mi pilersaarutit malillugit ingerlavoq.
Attaveqaasersuutit ukiuni kingullerni pitsaanerulernerat pissutaalluni takornarialerinerup periarfissagissaarnerulernissaa Nalik Venturesip naatsorsuutigaa.
EU suleqatigalugu suliniut nanginneqassaaq
EU-mi suliniutip Capacity Facilityp suliarinera pilersaarutit malillugit ingerlavoq, aningaasat siunnersuinermut, suliffeqarfinnik inerisaanermut najukkanilu piginnaasat pitsanngorsarnerinut atorneqarlutik. EU-mi suliniutip 2026-mi naammassineqarnissaa naatsorsuutigineqarpoq.
Miki Lyngep oqarnera naapertorlugu suliniutit suliffeqarfiit alliartornerup annerpaartaa suliffeqarfinnit kalaaliusunit pilersinneqarnissaa anguniagaavoq:
- Kalaallit Nunaat ineriartortillugu suliffeqarfiit aamma ineriartornissaat pingaaruteqarpoq. Uagut suliassaraarput ilisimasanut, piginnaasanut, aningaasaliinissamut aammalu suleqatigisanut nuna tamakkerlugu suliffeqarfinni suliffinnilu tamani periarfissaneersunik nalittorsaanissamut periarfissiissalluta, Miki Lynge oqarpoq.
