Nalik Venturesip siulersuisuini nikittoqartoq

Nalik Venturesip siulersuisui marlunnik nutaanik ilaasortartaarput, suliffeqarfiup oqarnera naapertorlugu taakku inuussutissarsiornikkut, aningaasaliinermut nunanillu tamalaanik suleqateqarluni ineriartortitsinermik misilittagaqarluarput.

Allattoq Nicole Sander Bertelsen

decembarip 02-at 2025 10:56

Namminersorlutik Oqartussat pigisaanni Nalik Venturesimi immikkut ittumik ataatsimeersuartoqarnerata kingorna siulersuisut nutaanik marlunnik ilapput.

Nalik Venturesip oqarnera naapertorlugu nunatsinni inuussutissarsiornerup ineriartornerani ilisimasaqarluartut naleqarluartumillu misilittagaqartut Malene Broberg aamma Signe Marie Sveinbjørnsson ilaasortanngorput.

Arnat marluk nunani tamalaani suleqatigiinnermik aningaasaliisarnermillu ilisimasaqartutut nassuiaatigineqarput.

- Siulersuisut ataqatigiissaarneqarnerat taamaasillutik nunap immikkoortuani atuutsitsissapput nunarsuarmullu avammut paasisimasaqartuussallutik, tusagassiuutinut nalunaarummi allassimavoq.

Malene Broberg Brugsenimi aningaasaqarnermut pisortaavoq. Signe Marie Sveinsbjørnssonilu aningaasaliinermi suliffeqarfimmi Heartcore Capitalimi peqateqartuulluni.

Malene Brobergip aamma Signe Marie Sveinbjørnssonip Jette Larsen aamma Lykke Geisler Yakaboylu taarserpaat.

Aamma atuarukGreat Greenland nutaamik pisortartaartoq

Nalik Ventures Namminersorlutik Oqartussat suliffeqarfianni siulersuisuni 2025-mi kisimik nikittoqarfiunngillat. Great Greenlandimi aamma nikittoqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.