Naleraq kommunit avinneqarnissaat pillugu taasisitsiniartoq

Naleraqqamiillu qineqqusaartut qinerneqassagunik kommunerujussuit avinneqarnissaata periarfissaanissaa sulissutiginiaraat, kommunillu marluk immikkut eqqarsaatigigaat Naleqqamit nalunaarput.

- Sermersooq qiviassagaanni kangia kitaalu assigiinngingaatsiartumik sullinneqarnerat naammalersutut suaarutigaarput, Pele Broberg oqarpoq.

Aamma qanimut oqartussaaqataanngitsutut misigisimaneq taama qineqqusaaruteqarnerannut pissutaasoq paasissutissiissutigaa. Kommunillu aappaa immikkut eqqarsaatigisaat avannaaniippoq.

- Jens Napaattuup saqqummiinermi oqaluttuarilaarpaa, Upernavik avannamullu immikkut kommuniorusuttut ilaat tamanna suaarutigigaat. Uagut ataqqivarput, tamat oqartussaaqataanerat qulakkeerniarlugu taanna kissaataappat, soorlu Qaasuitsup Kommunia avinneqarmat, aamma Avannaata Kommunia avinneqaqqissinnaasoq.

AAMMA ATUARUK Nunatta Qitornai: Kommunerujussuit atorunnaarsinneqarlik

Taakkua kommunit avinneqarnissaannut innuttaasut taasitinneqarnissaat qineqqusaarutigaat.

- Uagut inuit qulaatiinnarlugit aalajangiinianngilagut. Kisianni misissoqqaartariaqarpoq, takuteqqaarlugulu qanoq kinguneqassanersoq, innuttaasullu kingorna aperalugit, soorlu Qaasuitsup Kommunia avinneqarmat, Pele Broberg oqarpoq.

Kukkunerit nassuerutigineqarsinnaasariaqartut

Kommunerujussuanngortitsinermi sapinngisamik akikitsumik sullissinissaq takorloorneqaraluarpoq. Tamannali iluatsissimanngitsoq, Pele Broberg oqarpoq.

AAMMA ATUARUK Tamaat isigalugu: Naleqqap uku qineqqusaarutigissagai

Siumumut ilaasortaasimasut, Naleqqamilu maanna nuimanerit ilaanniittut, Hans Enoksen Jens Napaattoorlu kommunerujussuanngortitsinermut suleqataapput. Kukkusimanerli nassuerutigineqarsinnaasariaqartoq, Pele Broberg oqarpoq.

- Aalajangiisimalluni kukkusimagaanni nassuerutigisinnaassallugu ajunngilaq. Kommunerujussuanngortitsineq kukkunerusimappat, taava aamma uagut iliuuseqarnissatsinnut piareersimavugut. Pissutsit ajorpata soorunami akuersaarujuuginnarsinnaanngilagut, Pele Broberg oqarpoq.

Kommuneqarfik Sermersuup borgmesteria isumaqataanngitsoq

Aamma Nunatta Qitornai kommunit avinneqarnissaannik qineqqusaaruteqarput.

Partii kommunerujussuit iluatsissimanngitsut qanimullu oqartussaaqataaneq ajorseriarsimasoq Naleqqatut isumaqarpoq.

Kommuneqarfik Sermersuumili maanna borgmesteri, Charlotte Ludvigsen, partiinut marlunnut isumaqataanngilaq.

- Isumaqatiginngilara taannartaa iluatsinngitsumik oqariartuutigineqarnera. Isumaqarpunga illoqarfiit pingaarnersat annertoorujussuarmik akisussaaffimmik tigusinikuuvugut illoqarfeqatigisatsinnut nunaqarfinnullu, taamaattumillu tamat oqartussaaqataanerat nukittorsartuaannarlugu, taamaattumik aamma aalajangiisarnerit piffinnut aamma ukiut kingulliit, soorlu Paamiullu Tasiilarlu assersuutigalugit, akisussaaffimmik annerusunik tunisinukuuvugut pissutigalugu nammineq naajukkami aalajangiisarnerit ungasillisimasutut misigineqarmata, Charlotte Ludvigsen taama oqarpoq.

Kommunalbestyrelsi innuttaasut peqataatinneqarnissaannut periusissiorsimasoq, taanna oqarpoq.

- Innuttaasunik peqataatitsinermik periusissiornikuuvugut. Taassuma qulakkeertussaavaa innuttaasut kommunitsinnut tamarmik peqataatinneqartutut tusaaneqartutullu misigisimanissaat. Paamiuni Tasiilamilu namminneq najukkaminni aalajangiisartut annerusumik pisinnaatilernikuuvagut pisussaaffilerlugillu, taamaattumik naleqqussartuaannarneq kommunitsinni sulissutigivarput innuttaasut peqataasutut naleqartinneqartutullu misiginissaat pingaartikkatsigu aamma, Charlotte Ludvigsen oqarpoq.