Nunatta Qitornai: Kommunerujussuit atorunnaarsinneqarlik
Nunarput tallimanik ullumikkut kommuneqarpoq, taamaattuaannarnikuunngilarli.
Kommuninik aaqqissuusseqqinneq 2009-mi atuutilermat, kommunit 18-ininngaanniit sisamanngorput, Qaasuitsup Kommuniali kingusinnerusukkut avinneqarluni.
Kommunerujussuanngortitsinermili siunertarineqartut iluatsinngillat. Nunatta Qitornai kommunerujussuit atorunnaarsinnissaannik qineqqusaaruteqartut taama isumaqarput.
- Kommunit aaqqissuunneqarneranni iluarsartuussisimaneq iluatsinngitsuuinnikuuvoq, Nunatta Qitornaasa siulittaasuat, Vittus Qujaukitsoq oqarpoq.
AAMMA ATUARUK Nunatta Qitornaasa namminiilivinnissamut pilersaarut qineqqusaarutigigaat
Kommunerujussuit oqallisaasorujussuusareerput. Minnerunngitsumik taamani Qaasuitsup Kommuniani innuttaasunit, qanimut oqartussaaqataavallaarunnaarsimasutut misigisimasunit. Kommuni marlunngorlugu kingorna avinneqarpoq.
Ajornartorsiulli annerusoq, Vittus Qujaukitsoq isumaqarpoq.
- Inoqarfiit illoqarfiillu kommunimi allaffeqarfigisamut ungasippallaarujussuarnerat innuttaasut oqartussaaqataanerannut innalliimmat, iluatsinngivimmallu taamatut oqariartuuteqarpugut.
Innuttaasut aalajangiisuussasut
Qanimut oqartussaaqataaneq politikerinit naammattumik sulissutigineqanngitsoq Qaasuitsup Kommuniata avinneqarnissaanut oqallinnermi oqaatigineqarpoq.
Kommunit minnerit kommuninut annernut ikorfartorneqarsinnaaniassammata kommunerujussuit aamma pilersinneqarput.
Kommunerujussuilli atorunnaassappata, inoqarfiit arlallit suli suleqatigiissinnaanissaat Nunatta Qitornaasa takorloorpaat.
- Uani oqariartuutigivarput, pilersaruterput inoqarfiit imminnut qanittut kommuniunissaannik mattussinngimmat. Taamaattumik illoqarfiit imminnut qanigisariit kommunitut ingerlanissaannut kiffaanngissuseqarnerat uagut innarlernianngilarput,
Aamma allaffissornikkut aningaasartuutit ikilisarnissaata kommunerujussuanngortitsinermi siunertarineqarnera Vittus Qujaukitsup eqqaasitsissutigaa, aningaasartuutilli amerlisimasut oqaatigalugu. Allaffissornermiillu aningaasartuutit 2015-ip tungaanut amerlanerulersimasut taamani naliliinerup takutippaa.
AAMMA ATUARUK Nunatta Qitornaasa namminiilivinnissamut pilersaarut qineqqusaarutigigaat
Nunatta Qitornaasali kommunerujussuit qaqugu atorunnaassanersut ulluleriinngilaat.
- Qinigaaffiup tulliani kommunit nalilersuivigineqarnerat soorunami sulissutigivarput, aamma Inatsisartunit ukiut sisamat taakkua iluanni paasineqarluni kommunit aaqqissuutinneqaqqinnissaat pimoorullugu sulissutigineqassasoq neriuppunga, Nunatta Qitornaasa siulittaasuat, Vittus Qujaukitsoq oqarpoq.