Nakuusernerit nalunaarutigineqartut ukiup ataatsip iluani 50 procentimik qaffariartut
Kalaallit Nunaanni Politiit 2020-mut naatsorsueqqissaarnertik saqqummiuppaat. Pinerluttuliornerit ukiut marluk tulleriit amerleriartut tassani takutinneqarpoq.
Innuttaasut pinerluttulerinermik inatsimmik unioqqutitsisimasunik 2020-mi nalunaarutiginninneri 2019-imut sanilliullugit amerlanerungaatsiarput.
AAMMA ATUARUK Meeqqat illersuisuat: Meeqqanut persuttaasoqartarnera ernumanartumik takussaaleraluttuinnarpoq
Ingammik nakuusertoqarsimanermit nalunaarutiginninnerit naatsorsueqqissaarnermi amerleriaangaatsiarlutik. Nakuusertoqarsimanermit nalunaarutiginninnerit 2020-mi 1394-upput, tassalu ukiup siulianut saniliullugit 49 procentimik amerleriaateqartut politiit oqaatigaat.
Taakkuinnaanngillalli, aamma kinguaassiutitigut kannguttaatsuliornerit 207-init 240-nut amerleriarput.
Politiit oqarnerat naapertorlugu qaammarsaanerup ”Kinguaassiutitigut kannguttaatsuliornerit nalunaarutigikkit” kinguneratigut nalunaarutigineqartut amerlipput. Tamanna imannaanngilaq siornatigornit amerlanerusunik pinerluuteqartoqartalersioq.
Politimesteri: Ernumanarluinnartoq
Politiit nakuusernerit nalunaarutigineqartut amerlassusaat ernumassutigineruaat.
Politimesterip Bjørn Tegner Bayip isumakulunnartumik ineriartortoqartoq ”Politiit ukiumoortumik nalunaarusiaanni” oqaatigaa.
- Inuit ulorianartumik pinerlunniartut suli annertungaatsiartumik ajornartorsiutaapput - pingaartumik kinguaassiutitigut kannguttaatsuliornerit aamma nakuusertarnerit. Pinerluttuliortarneq, nunatsinni inuuniarnikkut ajornartorsiutinut ilaavoq, sulilu ajornartorsiutaanera annertusiartorluni, tamannalu aarlerinaqaaq, politimesteri oqarpoq.
AAMMA ATUARUK Angut Uummannami qungatsimigut kapineqartoq: Politiit qimmiata pinerluuteqartoq nassaaraa
Taassuma aamma allatamini ilannguppaa, nakuusernerit arfininngornermi unnuakkut nalaanneqakkajunnerusartut, taamaaliortoqartillugulu imigassamik aalakoornartortalimmik imersimasoqartarpoq.
Politiit suliniutinut assigiinngitsunut isumaginninnermik sullissisut, peqatigiiffiit allat peqatigalugit ataqatigiissaarneqartarput.
Nunatsinni nalunaarutiginnittarnerit Danmarkimut sanilliullugit marloriaammik amerlanerupput, Savalimmiunullu sanilliullugit qulingiluariaammik amerlanerullutik.
Politiit ukiumoortumik nalunaarusiaat uani atuarneqarsinnaavoq.
