Nakorsaaneq: Tamakkiisumik akiuussuserneqareersimaguit angerlarsimaannartariaarutissaatit
Juulip aallaqqaataani nunatsinnut tikittunut piumasaqaatit qasukkassapput.
Tamakkiisumik akiuussuserneqarsimasunut nunatsinnut tikinnermi angerlarsimaannartariaarullutillu misissorteqqittariaarutissapput.
- Akiuussusersimasuni tuniluuttoqarnissaa ilimanaateqarpallaarnavianngitsoq nalilersoratsigu, taamaa aalajangerpugut, taama nakorsaaneq Henrik L. Hansen oqarpoq.
Danmarkimulli tikinnermi missorteqqinnissaq misiliiffigineqarsimanermullu uppernarsaatip takutinnissaa pisariaqarpoq. Aamma timmisartorsuarmut ikilinnginnermi immersuiffik-sumut immersorsimasariaqarpoq.
Coronamut missortinneq ullunit pingasunit pisoqaanerussanngitsoq
Tamakkiisumik akiuussuserneqarsimasut nunatsinnut tikittut angerlarsimaannartariaarunnissaannut tunngaviuvoq coronamik tunillatsissimannginnermik uppernasaammi misissortissimaneq ullunit pingasunit pisoqaanerunnginnissaa.
- Timmisartorsuarmut ikilernermi misissorteqqissimanissaq piumasaqaataavoq. Tikereernermi misissorteqqittarneq isumannaallisaaneq pinerullugu misissuisoqaqqinnerulluni, taama Henrik L. Hansen oqarpoq.
AAMMA ATUARUK Tikinnermi maleruaqqusat qasukkarneqartut: Ilaasut amerlillutik angerlarsimaannartariaarunnerlu
Tikittut tunillaassuinissaannut aarlerinartoqanngila?
- Aap, aarlerinartoqanngilaq. Qaqutigoorami tunillaasinnaanerat.
Aasaanerani takornarianik tikittoqarnerunissaa ilaatigut taamatut aalajangernermi aamma pissutaava?
- Aamma taanna peqqutaaqataavoq, tikittartut amerlinerisigut tikinnermi misissorteqqittussat amerleriarujussuartussaapput, taakkununngalu misissuisinnaasut killeqarput, suliassarujussuusussaallunilu. Taamaammat suliat kivissinnaajumallugit taamatut aalajangertoqarpoq.
Ilaasut 810-niit 1.000-inut amerlisut
Juulip aallaqqaataaniit amerlanerusunik Danmarkimiit nunatsinnukartoqassaaq. Sapaatip akunneranut sisamariarluni timmisartuussisoqartassaaq, ilaasullu 250-it tikittalissallutik. Tassa imaappoq Kastrupiminngaanniit nunatsinnut tikittut sapaatip akunneranut 1.000-inik amerleriartassapput.
Timmisartuussinerit Islandimit aamma aammaanneqarput.
Air Greenlandip pingasunngormat nalunaarutigaa, Danmarkimiit nunatsinnut billetsit aggutsip 12-iata tungaanut nungoreersimasut. Air Greenland nalunaaruteqarmat suli piumasaqaatinik qasukkaanissamik nalunaaruteqartoqanngilaq.
Naalakkersuisut arfininngormat killilersuutinik sivitsueqqittoqassanersoq nalunaaramik, nalunaarutigaat maleruaqqusanik qasukkaassallutik.
AAMMA ATUARUK Julia Wille Danmarkimiit bilitsersisinnaanngilaq: Angerlarusukkaluarpunga
Massakkuugallartoq tikinnermi maleruaqqusat pingasunngorpamiit atuutilissapput. Maleruaqqusani allassimavoq sapaatip akunneranut nunatsinnut tikissinnaasut 810-iussasut.
Siorna assipaluanik nunatsinni pisoqarpoq.
Namminersorlutik Oqartussat taamanikkut juulip naalernerani coronaqalerneraniit angalaqqusiunnaarnerit tamaasa unitsippai.
Sapaatip akunneranut tikissinnaasut 600-inut aaliangiunneqarput, juulillu naalernerani tikissinnaasut killeerutsinneqarlutik.
Ukianngormalli maleruaqqusat sukateqqinneqaqqipput.