Tikinnermi maleruaqqusat qasukkarneqartut: Ilaasut amerlillutik angerlarsimaannartariaarunnerlu
Danmarkimiit nunatsinnut tikittartut sapaatit akunneranut sisamariarlutik ilaasut 250-it juulip aallaqqaataa aallarnerfigalugu tikittalissapput. Tassa sapaatit akunneranut ilaasut katillugit 1.000-it tikittalissapput. Taamatullu Islandimiit nunatsinnut angalaneq ammaanneqassalluni.
Tamakkiisumik akiuussuserneqarsimanngitsunut 72 tiimi angalanissaq sioqqullugu coronamut misissortissimanermut uppernarsaammi peqarnissaq suli piumasaqaataassaaq.
Tamakkiisumik akiuussuserneqarsimasut angerlarsimaannartariaaruttut Tunulu ammaqqilluni
Tamakkiisumik akiuussuserneqarsimagaanni nunatsinnut tikinnermi angerlarsimaannarnissamut piumasaqaat atuukkunnaarpoq. Tikinnermiillu ullut tallimat qaangiunneranni misissortittariaarutissaaq.
Qasukkaanermi aamma Danmarkimiit toqqaannaq tunumut tikittoqarsinnaanngussaaq angerlarsimaannaqqaartariaqarani. Tamakkiisumillu akiuussuserneqarsimanngikkaanni angerlarsimaannarallarnissamut piumasaqaat suli atuuppoq, ullullu tallimat qaangiunnerani misissorteqqinneq atuutissalluni. Tamakkiisumilli akiuussusersimagaanni atuutinngillat.
Timmisartoq Nordlandair nalinginnaasumik Nerlerit Inaannut angalaqqilissaaq.
Aalajangersakkat nutaat corona allattoqarfianiit innersuussutigineqartut tunngavigivaat partiillu siuttuisa isumaqatigiillutik taakku akuersissutigineqarput. Aalajangersakkat nutaat juulip aallaqqaataaniit septembarip aallaqqaataanut 2021 tungaanut atuukkallassapput.