Julia Wille Danmarkimiit bilitsersisinnaanngilaq: Angerlarusukkaluarpunga

Julia Wille pakatsisimavoq.

Taassuma Ilisimatusarfimmi ilinniarnerminut atatillugu Danmarkimi suliffimmik misiliinini naammasseqqammerluinnarpaa. Nuummilu aasarsiornissaminut qilanaarsimagaluarpoq.

Julia Willeli angalatitsivimmut sianerluni juulip ulluisa 21-anni angerlarnissaminut pisiniaraluarami billetsit aggustip qiteqqunnissaata tungaanut nungussimasut ilisimatinneqarpoq.

- Tupaallallungalu pakatsilaarpunga, angerlarusuppungami. Ukioq ataaseq Danmarkimeereerlunga ilaquttannut ikinngutinnullu maanna angerlarusuppunga, Julia Wille oqarpoq.

Københavnimiit Kangerlussuarmut juulimi angalanissat tamarmik pisiniarineqarsimasut Air Greenlandip uppernarsarpaa. Tamanna timmisartuutileqatigiiffiup qaammatip tulliani qanoq amerlatigisunik tunisaqarsinnaanerminik suli ilisimanninnginneranik pissuteqarpoq.

Maannakkutummi itsillugu nunatsinnit qanoq amerlatigisut aallarsinnaanerat suli killeqarpoq. Maannakkut 810-t aallarsinnaatinneqarput, Naalakkersuisulli juunip ulluisa 30-ata kingorna qanoq amerlatigisut aallarsinnaassanerannik suli nalunaaruteqanngillat.

Timmisartuutileqatigiiffilli billetsinik amerlanerusunik tuniniaasoqarsinnaatitsisoqalernissaanut piareersimavoq, Air Greenland paasissutissiivoq.

Ilinniartut ikiorneqartariaqartut

Tamannali 26-nik ukiulimmut Julia Willemut maanna iluaqutaanngilaq. Taanna tusagassiortutut ilinniarnerminut atatillugu Bornholms Tidendemi suliffimmik misiliilluni ukioq ataaseq sulivoq.

Suliffimmilli misiliinera maanna naammassivoq, aasarsiornissarlu tullinnguuppoq, tamannali neriuutigisimasaanit allaanerulaartussaarpasilerpoq.

- Angerlarsinnaalernissama tungaanut Danmarkimi inissarsiortariaqalerpunga.

- Maanna iluatsitsillunga sumiiffissarsisinnaassaanga, kisianni ilinniartunik allanik angerlarusukkaluarlutik Danmarkimiiginnartariaqartunik peqarnersoq naluara. Immaqa sumiiffissaqanngillat.

AAMMA ATUARUK Københavnimit nunatsinnut billetsit aggustip qiteqqunnerata tungaanut nungukkallartut

Julie Willep inuusuttut assingusumik nalaataqartut allat angerlarsinnaasariaqarsorai.

- Ilinniartut assersuutigalugu suliffimmik misiliinermi ilinniakkamilluunniit naammassinerminni kingorna angerlarnissamut periarfissaqartariaqarput, Julia Wille oqarpoq.

Billetsit tuniniarneqartut killeqartarnerat ilisimaneqareersoq

Billetsit tuniniarneqartut amerlassusaasa killeqartarnerat ilisimaneqareerpoq. Julia Willellu piffissaqarluarnermini pisisinnaagaluarnini nassuerutigaa. Tamannali ajornakusoorsimasoq nassuiaavoq:

- Danmarkimi ilinniakkamik misiliivunga, qaqugulu naammassinnissanerlunga nalornissutigilaarnikuuara. Tamanna sapaatip akunnerani matumani aatsaat paasivara.

- Angerlarnissannullu erngertumik misiliigaluarpunga.

Kalaallit Nunaanni najugaqaranilu ulluinnani nunatsinniinngikkaanni coronamut tunngatillugu killilersuutit malinnaaffiginiarnerat ajornakusoorsinnaasoq Julia Wille oqarpoq.

AAMMA ATUARUK Ammariartorneruleriartortoqartoq: Amerlanerusut nunatsinnut tikissinnaalersut

- Killilersuinerit qanoq innersut paasiniarnerat ajornakusoortorujussuusoraara.

- Billetsit tamarmik tunineqareersimanerat pillugu arlaanni atuagassarsinngilanga, taamaammat kingusinaarsorinngilanga. Angerlarnissannut piffissaqarluarlunga inniminniinissara isumaliutigisimanngilara.

Tassunga atatillugu ersarinnerusumik attaveqaqatigiittoqarsinnaanerarpaa. Billetsit nungungajalerneranik nalunaaruteqartoqarsimagaluarpat pitsaassagaluartoq taanna oqarpoq.

- Tamatuma misissornissaa inuup nammineq soorunami akisussaaffigaa, kisianni misissuiffissaqannginnerani susoqarnerata paasinissaa ajornakusoortorujussuuvoq.

- Danmarkimi Kalaallit Nunaannilu killilersuineqarpoq. Taakku ullormiit ullormut allanngorsinnaasarnerat pissutigalugu malinnaaniarneq ajornakusoorpoq.

KNR-ip Namminersorlutik Oqartussat qanoq amerlatigisunik nunatsinnut juulimi angalasoqarsinnaassanersoq paasiniarlugu attaveqarfiginiarpai. Tamannali pillugu suli akissutersisoqarani.