Ammariartorneruleriartortoqartoq: Amerlanerusut nunatsinnut tikissinnaalersut
![](/sites/default/files/styles/image_934x467/public/article_images/digi_vo_sync_timmisartoq_siulleq_still.jpg?itok=27cEKGcS)
Air Greenlandip inuit 810-t Danmrkimit timmisartumut sapaatip akunneranut maanna ilaasorisinnaalerpai.
Naalakkersuisummi nunatsinnukartussanut malittarissat qasukkarpaat – taamaalilluni nunatsinnukarniartut juunip aallaqqaataat aallarnerfigalugu 210-nik sapaatip akunneranut amerlanerusinnaalerput.
Sapaatip akunneranut killigitinneqartoq ippassaq 600-galuarpoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Kastrupimit timmisartumut ilaanissamut coronamik tunillatsissimannginnermut suli uppernarsaateqartassaatit. Aamma nunatsinnut tikikkuit angerlarsimaannartussaavutit tikinninniillu ullut tallimassaanni misissortittussaallutik.
Imaluunniit tamakkiisumik akiuussuserneqareersimaguit tikinnivit aqaguani misissorteqqissinnaavutit, taamaalillutik ulloq ataasiinnaq angerlarsimaannartussaassallutit.
AAMMA ATUARUK Killilersuinerit atorunnaarsinneqarput: Nutaanik tunillatsissimasoqanngilaq
Tamanna meeqqanut 12-iliineqanngitsunut aamma atuuppoq, meeqqallu marluliineqanngitsut misissortittariaqarunnaarlutik.
Nunatsinnukarnermut malittarisassat nutaat juunip ulluisa 30-anut atuukkallarput.
Inersimasut 18-leereersimasut aatsaat 75 procentii coronavirusimut akiuussuserneqareersimalerpata nunarput avammut aatsaat ammavinneqarsinnaavoq.
Tamanna aggustip septembarilluunnit qaammataani pisinnaasoq, Naalakkersuisut siulittaasuata Múte B. Egedep nalilerpaa.
Nunatsinnut Københavnip mittarfianit kisimi tikittoqarsinnaavoq, allaniillu tikittoqarsinnaanani.