Killilersuinerit atorunnaarsinneqarput: Nutaanik tunillatsissimasoqanngilaq
![](/sites/default/files/styles/image_934x467/public/article_images/188341153_953213462108427_6246444724907563625_n.jpg?itok=DFi8g-br)
Tunillatsissimasunik nutaanik arfinilinnik sapaatip akunnerata siuliani uppernarsaasoqarnerata kingorna nutaanik uppernarsaasoqanngilaq.
Taamaammat killilersuinerit tamarmik tallimanngormat atulersinneqartut unnugu unnuaq-qeqqanut atorunnaarsinneqaqqissapput.
Naalakkersuisut siulittaasuat, Múte B. Egede (IA) tusagassiortunik katersortitsinermi oqarpoq.
- Tuniluunneq maani Nuummi sapaatip akunnerata siuliata naanerani ernumanermik tamatsinnut pilersitsisoq aqunneqarsinnaasutut isikkulimmik inissisimalernera aallaavigalugu, ammaaqqinneq Nuummi unnuaruminngaanniit atuutilissaaq, Múte B. Egede oqarpoq.
Mittarfiliortuni tuniluuttoqartoq
Illoqarfiit pingaarnersaanni piffissami sivitsortumi coronavirusimik tunillatsissimasumik uppernarsaasoqarsimanngereersoq inuit marluk tunillatsissimasut paasineqarpoq. Tamanna taakku tikinnerannit ullut tallimassaani misissortinneranni paasineqarpoq.
Inummillu allamik tunillatsissimasoqartoq paasineqarpoq, taassumali tikinneranit sapaatit akunneri arfinillit ingerlareersimammata sumi tunillatsissimanersoq ilisimaneqanngilaq.
Taassuma suleqatai tamarmik misissortittussanngortinneqarlutillu angerlarsimaannartussanngortinneqarlutillu, tamatumalu kingorna inuit allat pingasut aamma tunillatsissimasut paasineqarpoq.
AAMMA ATUARUK Over 200 testet lørdag: Ingen nye smittede med corona
Tunillatsissimasorli ataaseq aamma illoqarfimmi nerisimallunilu imerniartarfissiorsimavoq. Taamaammallu nunatsinni nakorsaanerup ernummatigaa tuniluutipiloortoqalersinnaanera.
Taamaammat arfininngornermi maajip 22-iani Herefordimiissimasut, Daddy's-imi aamma Skylinemiissimasut Covid-19-imut misissortittarfimmut illoqarfiup qeqqaniittumut misissortikkiartornissaat kaammattuutigineqarpoq.
Mittarfiliortulli eqqaassanngikkaanni coronavirusimik tunillatsissimasunik allanik nassaartoqanngilaq.
Taamaammat Naalakkersuisut Nuuk tallimanngormalli matusimasoq ammaqqippaat.
Nuup matuneqarnerani Nuummiit angalannerit tamarmik matuneqarput. Umiarsuarmut timmisartumulluunniit ilaalluni illoqarfiit pingaarnersaannit aallartoqarsinnaajunnaartitsisoqarpoq. Imerniartarfiit, timersortarfiit tusarnaartitsinerillu matuneqarput. Pisiniarfinni bussinilu anersaartuutinut illersuuteqarnissaq piumasaqaataalerpoq.
Taakkuli maanna unnuap qeqqaniit atorunnaarsinneqassapput.
Naalakkersuisut oqarnerat naapertorlugu inuit 600-t missaanniittut sapaatip akunnerata naanerani misissortipput.
Maannakkutut isikkoqartillugu mittarfimmik sanaartornermi sulisut arfinillit tunillatsissimasutut uppernarsarneqarsimapput. Tamatumalu saniatigut amerikamiut Pituffimmi sakkutooqarfianni ataaseq aamma tunillatsissimasutut uppernarsarneqaqqalluni.
Innersuussutit suli malinneqarnissaat nakorsap innersuussutigaa
Naak tunillaassuuttoqarnera aqunneqarsinnaagaluartoq nakorsaaneqarfimmit nakorsap, Paneeraq Noahsenip kaammattuutigaa.
- Qanillinaveersaarit.
- Assavit eqqiluitsuutinnissaat eqqaamajuk.
- Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.
Nuummi tunillatsissimasunik sapaatip akunnerata siuliani uppernarsaasoqarnera pissutigalugu Naalakkersuisut Nuummi Ilulissanilu inunnut 50-ileereersimasunut akiuussutissamik Modernameersumik neqerooruteqarnissamik siuartitsipput.
Peqqinnissaqarfik Nuummi Ilulissanilu aqagu marlunngornermit marlunngorpat tullianut akiuussutissamik kapuiniarpoq. Akiuussutissaq Modernameersoq atorneqassaaq.
Nuummimi Ilulissanilu 50-ileereersimasut tamarmik neqeroorfigineqassapput. Peqqissaqarfik Ilulissat nunaqarfiinut aamma angalaniarpoq, taakkunanilu 18-ileereersimasut tamarmik neqeroorfigineqassallutik.
Akiuussutissamik kapuinissamut pilersaarut uani atuarsinnaavat.
Nutarterneqarpoq....