Corona: Nutaanik tunillatsissimasoqanngitsoq

Inuit 223-t coronaviruseqarnerlutik Nuummi arfininngormat misissortipput tamarmillu tunillatsissimanngillat. Nunatsinni nakorsaaneq Henrik L. Hansen taama paasissutissiivoq.

Tamanna nutaarsiassatsialaagaluartoq nunatsinni nakorsaanersup naqissuserpaa illoqarfimmi coronavirusimik tuniluuttoqarsinnaanera suli aarlerinaateqartoq.

-Illoqarfimmi suli ilisimanngisatsinnik tuniluuttoqarsimasinnaavoq, nakorsaaneq oqarpoq.

Nuummi inuit arfillit covid-19-imik tunillatsinnikuusut maanna ilisimaneqarpoq. Tamarmik timmisartoqarfiliornermik suliaqartuupput maannalu mattusimallutik.

Tunillatsinnikut marluk ataatsimik ilaqqittut, maanna nutaanik pingasunik ilaqqittut.

 Kalaallit Nunaanni piffissami sivitsortumi coronamik napparsimasoqanngereersorlu inuit marluk tunillatsissimasut sapaatip akunnera una paasineqarpoq. Avataaniit nunatsinnut tikinnerminniit ullut tallimassaani angerlarsimareerlutik misissortinnerminni covid-19-imik tunillatsissimasut paasineqarpoq.

Taava kingusiinnaa paasineqarpoq inuk alla aamma tunillatsissimasoq, sapaatit akunnerilu arfillit nunatsinneereersimammat suminngaanniit tunillatsissimanera naluneqarmat ilungersunartutut nalilerneqarpoq.

Tunillatsissimasumut suleqataasut tamarmik misissortissasut angerlarsimaannassasullu piumaffigineqarput. Misissuinernilu taakkunani coronavirusertut pingasut nutaat nassaarineqarput.

Tunillatsinnikuusorli neriartorsimavoq kingusiinnaalu imerniartarfiliarsimalluni. Taamaammallu nunatsinni nakorsaanerup ernummatigaa tuniluutipiloortoqalersinnaanera.

Taamaammat arfininngornermi maajip 22-iani Herefordimiissimasut, Daddy's-imi aamma Skylinemiissimasut Covid-19-imut misissortittarfimmut illoqarfiup qeqqaniittumut misissortikkiartornissaat kaammattuutigineqarpoq.

Timmisartoqarfiliortulli eqqaassanngikkaanni coronavirusimik tunillatsissimasunik suli nassaartoqanngilaq.