Nakorsaaneq AstraZenecamit akiuussutissaq pillugu: Siunissami qaninnerusumi kapuisukinnerusoqarsinnaavoq

Danmarkip AstraZenecamit akiuussutissamik atuineq atorunnaarallarniarlugu sisamanngornermi aalajangerpaa. Tamanna inuit akiuussutissamik kapiteqqammernerminni ilungersunartumik taqqatigut milittoornerata kingorna aalajangerneqarpoq.

Arnaq 60-inik ukiulik Danmarkimi AstraZenecamit akiuussutisserneqarsimanermi kingorna taqqamigut milittoorluni toquvoq.

Peqqissutsimut aqutsisoqarfik naapertorlugu akiuussutissaq taqqatigullu milittoornerup akornanni atassuseqartoqarnersoq piffissami matumani inerniliissutigineqarsinnaanngilaq. Akiuussutissamik atuineq sapaatini akunnerni marlunni unitsinneqarallarpoq.

AAMMA ATUARUK Danskeq 60-inik ukiulik toqusoq: AstraZeneca pasineqartoq

Tamanna nunatsinni sapaatini akunnerni aggersuni akiuussutissakinnerulernissaanik kinguneqarsinnaavoq.

Nunarpummi Danmarkimi akiuussutissaqassuseq aallaavigalugu maannamut pissarsiaqarsimavoq. AstraZenecamillu Danmarkimi atuinerup unitsinneqarallarnera pissutigalugu akiuussutissaq nunatsinnukartut ikinnerulersinnaasut, nakorsaanerup oqaatigaa.

- Tamanna naalagaaffeqatigiinni tamarmi piffissami akiuussutissakinnerulerneranik kinguneqassaaq. Unalu kinguartoortitsinermik nassataqarsinnaasunut ilaavoq, Henrik L. Hansen oqarpoq.

Misissuineq utaqqimaaraa

Pfizer/Biontechimit akiuussutissap imassai 1.200-it Danmarkimit ullumi sisamanngornermi tikipput. Pilersaarut malillugu sapaatit akunneri marluk qaangiuppata tikittoqaqqissaaq.

AstraZenecamiilli ajornartorsiutaasoq aaqqiivigineqarsinnaanersoq apeqqutaalluinnartoq, Henrik L. Hansen oqarpoq.

Nunarput AstraZenecamit akiuussutissamik pissarsinikuunngilaq. Nakorsaanerup pingaartumik nunatta avannaani kitaanilu akiuussutissap atorneqarsinnaanissaa pillugu allaanerusumik tassa Modernameersumik pissarsisinnaanissaq neriuutigaa.

Nunarpulli aalajangiisussaanngilaq, Henrik L. Hansen oqarpoq.

AAMMA ATUARUK Danmarkimi AstraZenecamik akiuussusiinissat taamaatinneqarallartut

AstraZenecamiimmi akiuussutissaq taqqatigullu milittoornerit akornanni ataqatigiittoqarnersoq Danmarkimi misissorneqassaaq. Taakku akornanni ataqatigiittoqanngippat kapuineq ingerlanneqaqqissaaq nunattalu AstraZenecamit akiuussutissamik Danmarkimit pissarsinissaq naatsorsuutigisinnaavaa.

- Qularnanngilaq, pissutigalugu akiuussutissaq taanna akiuussutissat naalagaaffeqatigiinni atorneqartussat ilarujussuarimmagu, nakorsaaneq oqarpoq.

Nakorsaaneqarfiup nunatsinniittut tamarmik akiuussutisserneqarnissaat anguniagarigallarpaa. Juunip ulluisa 21-anni tassa inuiattut ullorsiornermi akiuussutisserneqartussat tamakkerneqarnissaa naatsoruutigineqarpoq.

Danmarkilli akiuussutissamik AstraZenecameersumik unitsitsigallarnera anguniakkamik kinguartitsisariaqarnermik isumaqarsinnaavoq.

- Tamanna nunatsinnut sunniuteqarsinnaanera takorloorneqarsinnaavoq. Danskilli tungaanninngaanniit nunatsinnut qanoq pilersuerusutsigisoqarnera apeqqutaalluinnarpoq, Henrik L. Hansen oqarpoq.

Inuit 3 millionit akornanni taqqatigut milittoortut 22-t

Europami Nakorsaatinut Aqutsisoqarfiup (EMA-p) oqarnera naapertorlugu akiuussutissaq nassiunneqartoq akiuussutissap imassaani 1 millioninik imaqarpoq, taannalu EU-mi nunanut assigiinngitsunut 17-inut nassiunneqarluni.

Atassuteqartoqarnersoq EMA-p maanna misissuleruttorpaa.

EMA naapertorlugu paasissutissaatigineqarallartut malillugit inuit akiuussutisserneqarsimasut akiuussutisserneqarsimanngitsullu akornanni taqqatigut milittoornerit amerlanerunngillat.

Inuit akiuussutisserneqarsimasut 3 millionit akornanni 22-t taqqatigut milittoorsimapput. EMA naapertorlugu tamanna akiuussutisserneqarsimasunut sanilliullugu qaffasinnerunngilaq.

Danskit peqqinnissamut oqartussaasuisa akiuussutissap taqqatigullu milittoornerit akornanni ataqatigiittoqarnersoq misissorneqarneranni mianersornissamut tunngaveqarlutik akiuussutissersuinerit ulluni 14-ini unitsikkallarpaat.

EU-mi nunat allat arfinillit akiuussutissamit nassiunneqartumit taassuminnga akiuussutissalersuinerit unitsinnissaaq aalajangerpaat.

Tamatuma saniatigut Norgep AstraZenecamit akiuussutissutissat unitsikkallarneqarnissaat sisamanngornermi ualikkut aalajangerpaa.