Danskeq 60-inik ukiulik toqusoq: AstraZeneca pasineqartoq

Arnaq 60-inik ukiulik Danmarkimi AstraZenecamit akiuussutisserneqarsimanermi kingorna taqqamigut milittoorluni toquvoq.

Nakorsaateqarnermut Aqutsisoqarfik taama paasissutissiivoq.

Akiuussutissaq Nakorsaateqarnermut Aqutsisoqarfiup oqarnera naapertorlugu Østrigimi peqqissaasup akiuussutisserneqarnermi kingorna akunnerup affaata qaangiunnerani toqusup akiuussutissarsiarisaata nassiunneqartup assigaa.

Nassiunneqartumit taassuminnga akiuussutisserneqartut peqqissaasut marluk akiuussutisserneqarnermi kingornatigut taqqamigut milittoorput. Taakkuli aniguipput.

Ataqatigiittoqarneranut suli uppernarsaasoqanngilaq.

Inuit 3 millionit akornanni taqqatigut milittoortut 22-t

Europami Nakorsaatinut Aqutsisoqarfiup (EMA-p) oqarnera naapertorlugu akiuussutissaq nassiunneqartoq akiuussutissap imassaani 1 millioninik imaqarpoq, taannalu EU-mi nunanut assigiinngitsunut 17-inut nassiunneqarluni.

Atassuteqartoqarnersoq EMA-p maanna misissuleruttorpaa.

EMA naapertorlugu paasissutissaatigineqarallartut malillugit inuit akiuussutisserneqarsimasut akiuussutisserneqarsimanngitsullu akornanni taqqatigut milittoornerit amerlanerunngillat.

AAMMA ATUARUK Danmarkimi AstraZenecamik akiuussusiinissat taamaatinneqarallartut

Inuit akiuussutisserneqarsimasut 3 millionit akornanni 22-t taqqatigut milittoorsimapput. EMA naapertorlugu tamanna akiuussutisserneqarsimasunut sanilliullugu qaffasinnerunngilaq.

Danskit peqqinnissamut oqartussaasuisa akiuussutissap taqqatigullu milittoornerit akornanni ataqatigiittoqarnersoq misissorneqarneranni mianersornissamut tunngaveqarlutik akiuussutissersuinerit ulluni 14-ini unitsikkallarpaat.

EU-mi nunat allat arfinillit akiuussutissamit nassiunneqartumit taassuminnga akiuussutissalersuinerit unitsinnissaaq aalajangerpaat.

Tamatuma saniatigut Norgep AstraZenecamit akiuussutissutissat unitsikkallarneqarnissaat sisamanngornermi ualikkut aalajangerpaa.