Naalakkersuisut nutaat sisamat ivertinneqangajalersut

Naalakkersuisunut ilaasortat sisamat siorna marsimili tunuarput. Taakkualu kingoraartissaat ilisaritinneqangajalersut, naalakkersuisut siulittaasuat, Jens-Frederik Nielsen KNR-ip radiokkut aallakaatitassiaanut Ulluni Makkunani Pisunut oqarpoq.

- Naalakkersuisut sisamat ivertinneqarumaarput, Jens-Frederik Nielsen, oqarpoq.

Tassalu naalakkersuisunut ilaasortat sisamat qinigaaffiup aallartinneraniilli tunuartut amerlaqataannik kingoraarteqassapput.

Naalakkersuisut assigiinngitsorujussuarnik peqquteqarlutik ukiup kingulliup ingerlanerani tunuartut tassaapput: Bentiaraq Ottosen, Mads Pedersen, Vivian Motzfeldt Naaja Nathanielsenilu.

Taakkua akisussaaffii naalakkersuisunut ilaasortaasunut maannakkoqqissaaq arfiniliusunut agguaqqapput.

Kisianni naalakkersuisunik nutaanik ivertitsisoqangajalersoq, naalakkersuisut siulittaasuat oqarpoq.

- Marlunngornerup tungaanut suliarineqassaaq. Sioqqutsisumik piareertoqassappat, soorunami nalunaarutigiumaarparput, Jens-Frederik Nielsen oqarpoq.

Inatsisartut upernaakkut ataatsimiinnerat marlunngorpat aallartissaaq, inatsisartullu naalakkersuisunik nutaanik ivertitsisoqassagaangat, taakku ataasiakkaarlugit akuereqqaartarpaat.

Naalakkersuisunulli ilaasortat kisimik allanngornikuunngillat. Siumummi qaammat ataaseq matuma siorna ilaajunnaarmat, naalakkersuisoqatigiit allanngorput.

Siumullu naalakkersuisoqatigiinnissamut isumaqatigiissusioqataavoq. Taannalu isumaqatigiissut nalilersorneqartuartoq, naalakkersuisut siulittaasuata paasissutissiissutigaa. 

Allanngortinnissaanulli maannakkut takorluugaqarnani Jens-Frederik Nielsen oqarpoq.

- Suliassarput maannakkut pingaarnerpaaq tassaavoq, naalakkersuisunik ivertitsinissaq. Isumaqatigiissut partiinit sisamanit suliarineqarnikuugaluaq, taanna nalilersortuarneqassaaq. Aamma avammut oqariartuutigineqarumaarpoq, arlaatigut taanna allannguutissaqassappat, naalakkersuisut siulittaasuat Ulluni Makkunani Pisunut oqarpoq.