Mads Pedersen naalakkersuisutut tunuartoq

Mads Pedersen (IA) naalakkersuisutut tunuarpoq.

Mads Pedersen (IA) apriilimi meeqqanut, inuusuttunut ilaqutariinnullu naalakkersuisunngortinneqartoq tunuarpoq.

Tamanna Naalakkersuisut Siulittaasuannut, Jens-Frederik Nielsenimut (D) nalunaarutigeqqammerluinnarpaa.

- Sapaatip akunnerata siuliani Danmarkimiillunga aalajangerpunga. Ilaquttama pisariaqartikkaannga najuutinnginnama. 

- Nuliaralu facetimeluta ernera angajulleq iserpoq ilisisimallutik. Facetimerluta nuliama ernera eqikkaa takuara qissaserlungalu. Tassaniissinnaannginnama, ernera pakkussinnaannginnakku. Tassani aalajangerpunga tunuarniarlunga.

Sivisuumik eqqarsaatigigaa

- Ippassaq aalajangerpunga sukkanerpaamik tunuassallunga. Januaari naatinnagu. Juullertinnagu tunuarniarlunga, Mads Pedersen oqarpoq.

- Kisianni aalajangertinnanga eqqarsaat pigereerpara. Tarnikkut peqqissusera ammuinnaq ingerlagami. Naalakkersuisunngoramali nuannaarnera pilluarneralu annikilliartuinnaavikkami.

- Iperarsinnannginnakkit suliakka. Ilisimasakka naalakkersuisutut, Nunatsinni angalaninni takusakka. Sukkanerpaamik iliuuseqarfigineqarnissaat kissaatigigaluakkakka. Taakkua angerlaattarakkit, ilisimasat. Taava angerlarsimagaangama meeqqama oqaluukkaannga tusaagaluarlugit paasinngitsoortarakkit. Eqqarsaatikka misigissutsikkalu initungaarmata. Taava misigilerama meeqqakka sumiginnarlugit. Pilliuteqarpallaarama inuttut.

- Aalajangerama oqiliallappunga. Aliasuppunga meeqqat pakatsisissimagakkit. Meeqqat pillugit maaniippunga. Meeqqat pillugit tamaviaarpunga. Meeqqallu nukissamik tunisarpaannga. Kisianni peqqissusera pilliutigissagukku akisuallaarpoq. 

Tunuarputit. Qanoq ingerlasoqartussaagaluarpa?

- Inuit atugaat siullerpaasussaapput pingaarnerpaallutillu. Taama oqassaanga itisilernagu.

Mads Pedersen Naalakkersuisuunermini suliat assigiinngitsut aallartisarsimavai. 

- Meeqqat tapersersorneqarnissaannut inatsit allanngortittariaqarpoq, allanngortissaaq. Kommunit tassaasariaqarput ilaqutariinnik attassisut. 

- Neriuutigivara naalakkersuisut kommuninut qanimut suleqateqarnerat piviusunngussasoq. Aamma meeqqat maalaaruteqartarfissaannik tunngasoq suliaq ingerlassaaq. Aliasuutigivara soorunami uangaassanngimmat naammassinnittoq. Kisianni qujamasuutigivara unissanngimmata. Uanga tunuaraluarumaluunniit, Mads Pedersen oqarpoq. 

Mads Pedersen naalakkersuisutut piffissap sivikitsup ingerlanerani tunuartut aapparaat. Bentiaraq Ottosen (A) pisortat nittartakkatigut suliffissarsiortarfissaat nutaaq pillugu siunersiuisoqarnerata kingorna novembarip qiteqqunnerani tunuarpoq.