Naalakkersuisut nunatta avannaani piniartunut suliffissarsiornissaannik kaammattuinerat: Isornartorsiorneqangaatsiarpoq
Qaanaami nunaqarfinnilu pininartut oktobarimili ukiorlunneranit eqqugaaqqapput.
Piniartut taamaalillutik piniariarsinnaavallaanngillat, tamannalu aningaasaqarnerannut sunniuteqarpoq.
PAASISSUTISSAT
Qaanaamut, Qeqertanut Siorapalummullu qilalukkanik qernertanik ukioq mannamut pisassiissutaasunit 30-it kiisalu qilalukkanit qaqortartassiissutinit marluk suli pisarineqarsimanngillat.
Qaanaamut, Qeqertanut Siorapalummullu ukioq manna aavertasiissutaasunit 102-t suli aamma pisarineqarsimanngillat.
Aqutsiveqarfik Qaanaamut (Qaanaaq, Siorapaluk Qeqertallu) inuussutissarsiutigalugu piniartunut ukioq manna qulingiluanik nannuttassiissuteqarpoq. Siorna 2021-mi pisarinngitsuukkat arfineq pingasut ilanngullugit Aqutsiveqarfik Qaanaamut nannuttassiissutit katillugit 17-iupput. Ukioq manna maannamut arfineq pingasunik nannuttoqarsimavoq, taamaammallu Aqutsiveqarfik Qaanaami ukioq mannamut nannuttassani sinneruttut qulingiluaapput.
Qaanaamut, Qeqertanut Siorapalummullu ukioq manna qilalugartassiissutinit, aavertasiissutinit nannuttasiissutinillu pisarineqanngitsoortut aappaagumut pisassiissutissanut nuunneqassasut, Aalisarnermut Piniarnermullu Naalakkersuisoqarfimmit ilisimatitsipput.
Avannaata Kommuniata illoqarfiit nunaqarfillu innuttaqqortussusii pillugit paasissutissaatai naapertorlugit
Qaanaaq 619-inik
Siorapaluk 41-nik
Qeqertallu 26-nik inoqarput
Aalisartut piniartullu kattuffiat KNAPK naapertorlugu Qaanaami, Siorapalummi Qeqertanilu piniartut 60-it missaanniittut immikkut ittumik ikiorserneqarnissamik pisariaqartitsipput.
Qaanaami KNAPP-ip Inatsisartunilu ilaasortap Inuit Ataqatigiinneersup Mikivsuk Thomassenip Naalakkersuisut piniartunut immikkut ittumik ikioqquai.
AAMMA ATUARUK Nunatta avannarpasinnerpaartaani piniartut piniariarsinnaanngitsut
Taamaammat Isumaginninnermut, Suliffeqarnermut, Nunamullu Namminermut Naalakkersuisup Jess Svanep aalisartut piniartullu suliffissarsiortutut kommunimut nalunaariartoqquai, taamaalillutik pisortanit ikiorsiissutissarsisinnaassallutik.
- Nunatta avannarpasinnerpaartaani piniartut ukiorlunnera pissutigalugu ikioqqupput. Taakkulu kommunip suleqatigineratigut ikiorsiissuteqarfigerusuppagut, Jess Svane oqarpoq.
Qaanaamili aalisartut piniartullu peqatigiiffianni siulittaasoq, Tobias Simigaq Jess Svanes aaqqiissutiginiagaanik ilorrisimaarutiginninngilaq.
- Piniartut oqariartullattaapput ajoralugu. Imaakkami piniartut isertitalimmik sanileqarunik (aappaqarunik aaqq.) taamatut qinnuteqaraluarluni itigartitaasoqartarami, taavalu taannartaa qanoriliuusissaarunnarpoq naalakkersuisup taamatut isioqqusinera, Tobias Simigaq oqarpoq.
Isornarluinnartoq
Jess Svanep kaammattuinera malillugu piniartoq Nukappiannguaq Henriksen Siorapalummeersoq kommunimut ikioqquvoq. Taanna novembarimili silapilunnera pissutigalugu isertitaqarsimanngilaq.
- Iluamik tigugaluarpara 16-anni tallimanngormat Jess Svane upperalugu aatsigaluarama, kisiannili ullumi nalunaarfigitippunga tamanna naatsorsuutsinneq naammanngitsoq, suliffissarsiorsimannginnamagooq naatsorsuutissinnaanngilanga, Nukappiannguaq Henriksen oqarpoq, taassumalu qaqugu pisortanit ikiorsiissuteqarfigineqarnissaminut kommunimit nassuiaanneqarsimanani oqaatigaa.
AAMMA ATUARUK Qaanaami piniartut aalisartullu ukiorlummit aamma eqqugaapput
- Ajorluinnarpoq assut. Tassa uani takornarialerisut Coronap nalaani ajornartorsiuteqaleriarmata ingerlaannartumik tunineqarnikuupput, uagulli piniartuusugut namminersortuusugut tunineqarumanata. Suna pissutaasimanerpoq tassani. Immikoortitsineruvoq, Siorapalummeersoq Nukappiannguaq Henriksen oqarpoq.
Inatsisartuni ilaasortap Inuit Ataqatigiinneersup Mikivsuk Thomassenip (IA) piniartut ikiorserneqarnissamik qinnuteqarnerannut naalakkersuisut akissutaat pakatsissutigaa.
- Soorunami taamatut akissuteqartoqarnera tusarakku pakatsivunga, uggorisorujussuuara aamma ajuusaarnarivara, Mikivsuk Thomassen oqarpoq.
Taamaammat Inuit Ataqatigiinnut Siumumullu piniartut aningaasatigut ikiorserneqarnissamik qinnuteqaataat isummerfigeqqeqqullugu kaammattuuteqarpoq.
Inuussutissarsiutitik qimassagaat
Siumut isornartorsiuisunut tapersiivoq.
Siumup politikkikkut oqaaseqartartua Doris J. Jensen piniartut suliffissarsiortutut allatsinnissaannik kaammattuinermi taakkununnga inuussutissarsiutaannik qimatseqqusinerusoq allappoq.
Naalakkersuisut piniartunut taamak oqariartornerat ilungersunartutut isigaara, isumaqarpungalu naalakkersuinikkut suliassaq ilungersunartoq qarsupittumik suliariniarneqartoq. Sineriassuatsinni piniartut, Kulusummi solarip kuussimaneranik eqqugaasut ilanngullugit, inuussutissarsiornerminnut ikiuutaasinnaasumik noqqaallutik oqartussanut saaffiginnipput.
- Akissutaasinnaanngilaq inuussutissarsiutertik qimallugu nunamiunngorlutik ikiorsiissutinik pisartagaqalissasut, Dories J. Jensen oqarpoq.
Taanna Naalakkersuisut aaqqiissumik pitsaasumik nassaarsiornissartik akisussaaffigaat isumaqarpoq. Doris J. Jensenillu Naalakkersuisoq Jess Svane piniartunut utoqqatsissuteqarnissaanik kaammattuuteqarfigaa.
Isumaginninnermut, Suliffeqarnermut Nunamullu imminermut Naalakkersuisoqarfiup piniartut aningaasatigut ikiorserneqarusukkunik suliffissarsiortutut allatsinnissaat marlunngornermi ualikkut erseqqissaatigeqqippaa.
Pisortanit ikiorsiissutit suliffissarsiortutut allatsinnikkut ilaatigut pissarsiarineqarsinnaapput.
Aalisartut piniartullu aalisartutut piniartutullu inuussutissarsiornermi allagartatik suliffissarsiortutut allatsinnikkut annaanavianngikkaat naalakkersuisoqarfiup aamma erseqqissaatigaa.
Suliani ataasiakkaani aalisartut piniartullu pisortanit ikiorsiissuteqarfigineqarsinnaanersut inummut ataatsimut naliliisoqartuaannartoq aamma allassimavoq.